OÉ-CUSSE, 22 Novembru 2024 (TATOLI) – Konstrusaun palku ba komemorasaun Loron Proklamasaun Independénsia ba da-49, iha 28 Novembru, iha kampu 01 de Maio Palaban, Rejiaun Administrativa Espesiál Oé-Cusse Ambeno (RAEOA) daudaun ne’e atinje ona 75%.
“Ita-nia prepasaun la’o di’ak, palku ne’e atu konklui iha aban, hela 25% remata ona”, MinistruAdministrasaun Estatál (MAE), Tomás do Rosário Cabral, hanesan Prezidente Komisaun Organizadora informa ba jornalista sira iha Palaban, ohin.
Governante ne’e salienta katak preparasaun ba palku, feira, konsertu muzikál ne’e Governu sentrál mak responsabiliza, maibé ba mobilizasaun masa ne’e husi parte RAEOA.
Iha selebrasaun loron ne’e sei iha atividade prinsipál sira mak hasa’e bandeira nasionál, kondekorasaun, atribuisaun títulu na’in ba rai, ne’ebé sei hala’o iha kampu 01 de Maio no ba konsertu muziká no feira kulinária sei konsentra iha monumentu Lifau.
“Aban hahú abertuta feira iha monumentu Lifau, ne’ebé agora komisaun mós prepara ba mobilizasaun masa husi suku 18 iha Oé-Cusse”, nia adianta.
Husu kona-ba orsamentu ba preparasaun 28 Novembru, governante ne’e la esplika detalla. “Orsamentu ba preparasaun ha’u lahatene, agora ami mai serbisu ne’ebé diretór nasionál sira mak hatene kona-ba alokasaun orsamentu ba selebrasaun ne’e”, nia salienta.
Notísia relevante:Kampu 01 de Maio Palaban fatin ba komemorasaun 28 Novembru
Tema prinsipál ba aniversáriu loron nasionál ka Loron Proklamasaun Independénsia da-49 iha 28 Novembru 2024 mak “Orgullu ba ita-nia identidade no kultura, ita harii futuru liberdade, justisa no esperansa ba ita-nia Povu”.
Jornalista: Abílio Elo Nini
Editora: Maria Auxiliadora