COVALIMA, 25 Novembru 2024 (TATOLI) – Empreza Kochi Agrifarm Cooperative husi Japaun fó teste língua japoneza ba joven na’in-hitu ne’ebé sei bá serbisu iha área agrikutura iha nasaun ne’e. Entrevista ne’e hala’o iha suku Maudemo, postu administrativu Tilomar, munisípiu Covalima.
Reprezentante empreza Kochi Agrifarm Cooperative, Yukiko Nishimori, informa katak joven sira iha Timor-Leste akompaña mídia kona-ba Japaun nia kultura, tanba ne’e sira iha inisitiva tuir formasaun lian Japaun.
“Tan ne’e, empreza fó teste tanba joven sira hakarak aprende lian Japaun, nomós hakarak hatene kultura Japaun no serbisu agrikultura iha Japaun. Tanba ita hatene serbisu agrikultura iha Japaun diferente iha Timor-Leste”, Yukiko Nishimori dehan iha sentru formasaun Mirai Sato Japaun, iha Tilomar, ohin.
Sentru formasaun ne’e loke tanba inisiativa husi joven-sira atu aprende língua no liuhusi sentru formasaun ne’e bele rekruta joven sira ne’ebé hakarak serbisu iha agrikultura. “Ita hatene serbisu agrikultura uza ho modern, uza ekipamentu elektroniku kompara ho ita-nia nasaun katak serbisu agrikultura uza sistema tradisionál”, nia afirma.
Formadora lian Japaun, Estetlita Bui Moniz, reforsa katak empreza fó teste ba timoroan na’in-hitu ne’ebé durante ne’e tuir formasaun durante fulan rua, iha sentru formasaun Mirai Sato Japaun.
“Sentru formasaun Mirai Sato Japaun harii husi timoroan ho naran Julião Nunes José. Harii iha 2019, ne’ebé daudaun ne’e serbisu iha sentru formasaun ne’e. Ami hetan apoiu husi embaixadada Japaun iha Timor-Leste”, nia salienta.
Joven-sira ne’ebé tuir formasaun iha sentru Mirai Sato Japaun hamutuk 26 no bainhira iha oportunidade bele bá serbisu. Durante ne’e, sentru formasaun haruka ona joven na’in-rua husi Covalima bá serbisu iha Japaun.
Iha 2024, formandu na’in-hitu ne’ebé tuir ona teste entrevista ho lian Japaun no hafoin ne’e sei tuir tan teste entrevista iha Sekretaria Estadu Formasaun Profisionál no Empregu (SEFOPE) no bainhira pasa mak foin bele arranka bá Japaun.
Tuir planu, sentru formasaun Mirai Sato Japaun sei haruka, iha tinan ne’e, joven na’in-tolu bá serbisu, maibé depende rezultadu teste entrevista husi SEFOPE
Formandu Hermengildo Moniz da Cruz kontente bainhira empreza fó teste direta ba sira, nune’e bele bá serbisu iha Japaun, iha área agrikultura.
“Ami tuir formasaun lian Japaun ne’e, ami-nia inisiativa rasik oinsá atu aprende no motiva ha’u bá serbisu iha área agrikultura no bele ajuda motiva joven sira ne’ebé dezempregu”, hateten.
Notísia relevante: Empreza ualu husi Japaun hakarak rekruta timoroan
Jornalista: Celestina Teles
Editora: Maria Auxiliadora
