DILI, 25 novembru 2024 (TATOLI)–Arsebispu Arkidioseze Metropolitana Dili, Dom Vírgilio Kardeál do Carmo da Silva, SDB, hateten igreja Katólika liuhusi Konferénsia Episkopál Timorense (CET, sigla portugés) husi Dioseze Baucau, Dili no Maliana aproxima ona ho Polísia Nasionál Timor-Leste (PNTL) hodi halo invetigasaun ba prezensa seita (sekte) ka Igreja Catolika Carismatica Independente Timor-Leste (ICCI-TL) ne’ebé virál iha rede sosiál.
“Primeiru pasu ba iha akontesimentu ida-ne’e, ha’u kontatu kedas bispu na’in-rua (2) no ami na’in-tolu foti desizaun ida-ne’ebé hanesan hodi halo aproximasaun hanesan ba insituisaun relevante hanesan Polísia Nasionál Timor-Leste atu bele hare kona-ba ida-ne’e no halo investigasaun sé mak ida ne’e. Ema ne’e amululuik duni ka lae no mai husi ne’ebé, ida-ne’e mak prosesu ida-ne’ebé mak halo daudaun,” Dom Virgílio Kardeál do Carmo da Silva, SDB, hateten ba jornalista sira iha Sede Episkopál, Lecidere, segunda ne’e.
Dom Vírgilio hateten, nia parte mós hakfodak kuandu ema haruka mensajen kona-ba sira-ne’ebé hatais kazula tanba kazula vestimentu amululik ida ninian ne’ebé normalmente kazula tuir liturjia nia lala’ok ne’e fó iha serimónia ba diakonu bainhira ba ordenasaun saserdotál mak bispu entrega kazula no estola.
Kardeál dehan, ezistensia grupu ne’e ilegál tanba la tuir prosesu ida tuir liturjia igreja katólika romana no laiha pedidu autorizasaun orijen ema hirak ne’e.
“Liuhusi ordenasaun ofisiál mak foin entrega ba sira vestimentu sira-ne’ebé uza selebra Eukaristia. Mosu iha públiku ami mós la rekoñese, ida-ne’e amululik ka la amululik, ami lahatene. Tanba, amululik ne’ebé tama iha dioseze ida, tuir dalan mai husi li’ur ka ne’ebé tenke liuhusi dalan ida-ne’ebé iha koñesimentu bispu ida-idak. Ema ida mai selebra misa ida, iha dioseze ida iha parokia ida ema ordenadu lugar tenke hatene,” nia dehan.
Ema ida-ne’ebé mai la liuhusi dalan ida-ne’e, igreja lahatene ni konsidera hanesan aktu illegal, tanba lahatene mai husi ne’ebé no sira-ne’e sé.
“Ita hotu-hotu hakruuk ba lei iha nasaun ida, entaun ami halo hela aproximasaun liuhusi ita-nia instituisaun ne’ebé iha kompeténsia ida-ne’e atu halo investigasaun ida kona-ba aktu sira-ne’e. Tanba, ami igreja katólika Timor ninian, ita hotu-hotu hatene, ita-nia padre sira hotu ne’ebé serbisu iha dioseze tolu nian,” nia hateten.
Husu kona-ba sansaun saida mak bele fó ba ema sira-ne’e, kardeál hatán, tenke hein invetigasaun hodi hatene faktus sira-ne’e, tanba molok igreja foti desizaun ba ida-ne’e tenke hatene uluk kona-ba loos ka lae kona-ba faktus sira-ne’e.
Jornalista : Jesuína Xavier
Editór : Cancio Ximenes
