DILI, 25 novembru 2024 (TATOLI)—Deputadu KHUNTO iha Parlamentu Nasionál (PN), António Verdiál de Sousa, husu kria lei liberdade relijioza hodi bele regula grupu relijiaun sira ne’ebé tama mai hala’o atividade iha Timor-Leste (TL) ne’ebé dutrina la klaru.
Notísia Relevante: Igreja aproxima PNTL halo investigasaun ba prezensa Seita ICCI-TL
Nia preokupa, tanba daudaun ne’e iha seita (sekte) ka grupu oan ida-ne’ebé hamosu padre no bispu foun iha Timor-Leste, nune hanesan Deputadu liuliu ita lejisladór, nia-parte husu tenke haree lei ba liberdade relijioza, ne’ebé sei fó distinsaun ba relijiaun ka grupu relijiaun no Estadu fó rekezitu atu grupu ida naran tama mai nasaun hodi forma nia grupu ka komuniade babain sira.
“Grupu ruma ne’ebé laiha baze dutrine ne’ebé klaru, estrutura forte, labele tama hodi bosok povu, labele hetan personalidade jurídika iha rai ida ne’e. Restu, komunidade ida-idak hanesan Igreja Katólika mak tenke hanorin didi’ak nia emar sira atu labele halai tun-sa’e no fó ezemplu di’ak ba ema seluk tama nia komunidade,” Nia levanta liuhusi reuniaun plenária PN, segunda ne’e.
Tanba ne’e, nu’udar deputadu labele dehan Timor Igreja Katólika nian, maibé lafaek mai karik timoroan buka dalan ho fiar metin.
Hanesan Deputadu, Nia husu ba Estadu oinsá halo lei hodi regulariza situasaun hirak ne’e.
Hatán ba preokupasaun ida-ne’e, Vise Ministru ba asuntu Parlamentár, Adérito Hugo da Costa, hateten kona-ba grupu ka seita (sekte) foun ne’ebé virál tebes iha loron rua ikus ne’e bispu Dom Carlos Filipe Ximene Belo, SDB, ninia konfirmasaun klaru ona.
“Konfirmasaun ikus Bispu Belo, klaru iha ninia dokumentu esplika klaru. Kestau ida-ne’e sei envia ba entidade relevante, inklui Igreja atu haree pontu situasaun ba dezenvolvimentu organizasaun sira-ne’ebé dalaruma bele mós kria konfuzaun no bele kria mós konflitu iha ita-nia sosiedade,” nia hateten.
Jornalista : Nelson de Sousa
Editór : Cancio Ximenes
