DILI, 25 novembru 2024 (TATOLI)—Parlamentu Nasionál (PN), segunda ne’e, liuhusi reuniaun plenária aprova votu númeru 15/2024 pezár ba falesimentu saudozu António Soares da Silva “Maucalo”, ne’ebé hakotu iis iha loron 12 outubru 2024 iha ospitál Pantai, Malázia ho idade 62.
“Rezultasaun votasaun afavór 54, kontra 0 no abstensaun 0, ho nune’e votu pezár ne’e pasa,” Primeira Vise Prezidente PN, Maria Teresinha Viegas, fó sai iha sala plenária PN.
Tuir testu votu pezár, ne’ebé segundu Sekretária Meza PN, Maria Teresa Gumão, lee sai katak saudozu moris iha suku Makadiki, postu administrativu Uatulari, munisípiu Viqueque, iha loron 12 Setembru 1962 no saudozu koronél nu’udar lutadór ba kauza ukun rasik aan.
Saudozu oan husi João da Silva ho Domingas da Silva, ne’ebé maun-alin na’in-sia no saudozu nu’udar oan datoluk no kaben ho Etelvina Fernandes Belo ho oan hamutuk na’in-sia (9).
Saudozu partisipa iha momentu istória lubun iha luta ba libertasaun nasionál, iha tinan 1975-1976 nu’udar soldadu iha organizasaun FALINTIL lidera husi ho Komandante Amado.
Iha tinan 1977, asume kargu hanesan Komandante ba Forsa Intervensaun, lidera husi Komandante José Monteiro.
Iha tinan 1978, nia simu kargu hanesan Komandante Pelotaun iha Kompañia Brigada Choque, lidera husi Komandante KaluWai ho Komandante David Alex (Daitula) iha setór leste.
Iha tinan 1981 to 1985, nia hanesan Komandante ba Pelotaun destakadu iha rejiaun norte, hamutuk ho Komandante “Fera Lafaek” ho Komandante “Selalu Mau” ho Adjuntu Handokan.
Iha tinan 1991, nia asume kargu hanesan Komandante Unidade Rejiaun Rai Klaran, ho responsabilidade ba Komandante Lere Anan Timur.
Iha tinan sira-ne’e mós, nia hetan kapturasaun husi forsa Indonézia husi batallaun 303 iha Fatuberliu-Bee Manas Weberek, iha Ainaro, ho nia dadur durante tinan balun liu husi Nanggala.
Depois hetan libertasaun kontinua partisipa ativa iha organizasaun klandestina hamutuk ho Kamarudin, Matak, Lao Lima, Tubir Loke Dalan ba Dame no seluk tan, ne’ebé iha ligasaun ho saudozu David Alex “Daitula”.
Liuhusi Kamarudin ho Soekarno simu orientasaun hodi espalla rede klandestina. Entre tinan 1998-1999, nia asume funsaun hanesan Konsilleiru iha grupu organizasaun klandestina ne’ebé lidera husi Criado.
Entre tinan 2001-2016, nia promove ba postu Tenente-Koronél ho asume kargu hanesan Xefe ba Inspesaun Jerál iha Kuartél Jerál F-FDTL nian.
Iha tinan 2017-2022, nia sai hanesan Xefe Casa Militár Prezidénsia Repúblika.
Entre tinan 2020-2024, asume funsaun hanesan Xefe ba Diresaun Justisa ho Dixiplina iha Kuartél Jerál F-FDTL nian no promovidu ba postu koronél.
Ho kontribuisaun no dedikasaun tomak durante vida tomak, ba luta libertasaun nasionál Timór-Leste, António Soares da Silva “Maucalo” hetan kondekorasaun ho medalla Ordem de Guerrilha iha loron 19 Maiu 2017, rekoñese ho dedikasaun eskluziva, koresponde ba tinan 15, 19 iha partisipasaun.
Saudozu mós hetan kondekorasaun medalla Colar Ordem Timor-Leste ba nia funsaun ne’ebé ezerse hanesan komandante unidade no medalla Ordem Timor-Leste hanesan xefe Casa militár ba Prezidénsia Repúblika iha Maiu 2022.
Nune’e Parlamentu Nasionál, liuhusi reuniaun iha sesaun plenária, espresa ninia profundu pezár ba falesimentu saudozu Maukalo, hato’o sentidu kondolénsia ba ninia família no amigu enlutada
Deputadu FRETILIN, Aniceto Longuinhos Guterres Lopes, nu’udar proponente ba votu pezár ne’e dehan, saudozu koronél ativu no veteranu ida famozu iha Timor-Leste, nune’e husu PN hanesan onra no omenajen, mai aprova votu pezár ida-ne’e.
Notísia Relevante: Koronel Maucalo hakotu iis hafoin halo tratamentu saúde iha Malázia
Jornalista : Nelson de Sousa
Editór : Cancio Ximenes
