DILI, 25 novembru 2024 (TATOLI)—Prezidente Parlamentu Nasionál (PPN), Maria Fernanda Lay, konsidera Prezidente Repúblika (PR), José Ramos Horta, nia inisiativa ba rekonsiliasaun nu’udar papél ida husi premiadu Nobel da Pás.
“Desde povu bele moris hamutuk iha ne’e mak entende malu ida-ne’e importante, tanba rekonsialiasaun la’ós ho maluk li’ur de’it maibé iha rai-laran mós tenke rekonsilia malu. Rekonsialiasaun ne’ebé inisia husi Prezidente Repúblika ne’e papél Nobel da Pás, nia tenke buka pás ba ita timoroan,” PPN hateten hafoin hasoru malu ho PR Horta, iha Palásiu Prezidensiál, Bairru-Pité, segunda ne’e.
Notísia relevante : PR Horta husu joven sira promove rekonsiliasaun
Maski nune’e, PPN laiha serteza katak povu balun bele prontu simu rekonsiliasaun hafoin liu funu.
“Ita-boot sira ba husu ida-idak, halo survey, ha’u laiha tempu ba iha ne’ebá,” akresenta.
Antes ne’e, PR Horta hateten, iha loron komemorasaun proklamasaun independénsia ba dala-49 ne’ebé sei realiza iha Rejiaun Administrativu Espesiál Oé-cusse Ambeno (RAEOA) ne’e sei iha delegasaun boot ida husi Indonézia, ne’ebé bele iha novidade boot ida.
“Ha’u mós konvida eis Jenerál sira mai, hamutuk ho sira ita hametin nafatin rekonsialiasaun. Rekonsilia rai-laran, hametin rekonsialiasaun ho Indonézia di’ak liutan, pur tantu ha’u kontente ho programa ne’ebé Governu prepara iha Oé-cusse,” Xefe Estadu tenik.
Jornalista : Osória Marques
Editora : Julia Chatarina
