DILI, 25 Novembru 2024 (TATOLI)–Prezidente Repúblika (PR) José Ramos Horta, segunda ne’e, konvoka enkontru koordenasaun serbisu ho altu entidade defeza no seguransa.
“Prezidente Repúblika konvoka enkontru ida atu haree nia koordenasaun serbisu entre tarefa atribui ba Ministériu Defeza (MD), Polísia Nasionál Timor-Leste (PNTL) no Servisu Nasionál Intelijénsia (SNI), liu-liu kona-ba planu no preparativu ba delegasaun Indonézia nian ne’ebé sei mai partisipa iha loron Proklamasaun Independénsia 28 novembru. To’o agora seidauk iha konfirmasaun ofisiál, maibé ita hatene ona katak konvite Prezidente Repúblika nian hato’o ba Prezidente Repúblika Indonézia,” Diretór SNI, Longuinhos Rabindranatha Tagore Domingues de Castro Monteiro , informa ba jornalista sira hafoin enkontru ho Xefe Estadu, iha Palásiu Prezidensiál, Bairru-Pité.
Notísia relevante : Delegasaun RI no autoridade RAEOA diskute investimentu iha turizmu no aeroportu
Nia dehan, ho razaun Prezidente Repúblika Indonézia, Prabowo Subianto, sei hala’o serbisu diplomasia iha rai-li’ur maka posibidade sei delega Ministru ida hodi reprezenta hodi partisipa serimónia selebrasaun Proklamasaun Independénsia.
“Maski númeru efetivu konvidadu ne’ebé partisipa serimónia seidauk hatene, maibé halo resesivu katak númeru ne’e sei boot, tanba ne’e tenke hatene preparativu saida mak Timor sei halo atu simu delegasaun sira iha Timor-Leste,” nia akresenta.
Posibilidade delegasaun husi Indonézia sei to’o iha loron 27 novembru, hafoin sei halo sesaun ida iha Dili no loron 28 dadeer maka delegasaun desloka bá Oé-cusse hodi partisipa iha serimónia.
Iha sorin seluk, Ministru Defeza Xefe Estadu Maiór Jenerál Forsa Armada, aprezenta planu seguransa preparativu onra no protokulu Estadu ne’ebé Timor sei aprezenta ba delegasaun VIP Indonézia nian.
“Delegasaun sei iha probabilidade karik iha Ministru seniór ida mak mai, bele iha númeru 30 no 40 ka bele liu,” nia akresenta.
Diretór SNI espera katak delegasaun sei reprezenta husi Ministru seniór ida, tanba bainhira nível Prezidente Repúblika, preparativu loron-rua ne’e la’ós normál, se bainhira halo reseisaun Estadu ruma atu simu Xefe Estadu ida.
Jornalista : Osória Marques
Editora : Julia Chatarina
