DILI, 25 novembru 2024 (TATOLI)—Prezidente Repúblika (PR), José Ramos Horta, promulga ona Proposta Lei Orsamentu Jerál Estadu (OJE) ba tinan fiskál 2025 ho montante biliaun $2,6.
PR Horta dehan, iha fulan hirak nia laran simu ona kopia ida no estuda kleur tiha ona, ne’ebé nia rasik nota katak laiha problema Konstitusionál.
“Ohin dadeer ha’u simu Prezidente Parlamentu Nasionál, entrega ba ha’u Orsamentu Jerál Estadu 2025, ha’u promulga tiha ona, tanba fulan hirak nia laran ha’u simu tiha kopia ida no ha’u estuda kleur tiha ona, ne’ebé laiha problema konstitusionál. FRETILIN no PLP vota kontra la hatene tanba sá, maibé ha’u fira la’ós kestaun Konstitusionál, pur tantu fulan-ida nia laran mais ou menus ha’u simu tiha ona estuda kleur tiha ona ne’eduni ohin kedas ha’u promulga,” Xefe Estadu informa bainhira akompaña Deputada Repúblika Indonézia (DPRI, sigla indonéziu), Julie Laiskodat, vizita Konventu Madre Alma, iha Bebonuk, segunda ne’e.
Notísia relevante : PN sei envia proposta-lei OJE 2025 ba PR iha 25 novembru
Iha parte seluk, PR Horta ladún konkorda Governu seidauk halo reforma maka’as ba instituisaun públika ne’ebé eziste barak iha Timor-Leste.
“Primeiru-Ministru mós preokupadu ida-ne’e, instituisaun públika ne’e barak demais iha Timor-Leste, ha’u hanoin ba ita-nia ekonomia, ita-nia populasaun instituisaun públika de’it hanesan Governu lalika halo sira-nia serbisu instituisaun públika mak halo ne’e mak ha’u la konkorda, maibé la’ós orsamentu,” nia akresenta.
PR espera ba oin Governu bele estuda ne’e didi’ak tanba Xefe Governu Xanana Gusmão antes ne’e rekoñese instituisaun públika barak demais.
“Ha’u espera tinan 2025 Governu bele estuda didi’ak tanba Maun Xanana mós uluk hateten instituisaun públika barak demais, barak la serbisu, serbisu saida, eletrisidade mate moris, bee mate moris, farmasia medikamentu sempre problema, sira serbisu saida. Hanesan SERVE serbisu saida maibé prontu ne’e lá’os kestaun ida Konstitusionál, ne’e kestaun governasaun, Primeiru-Ministru mak tenke haree ne’e ba oin,” PR Horta katak.
Iha sorin seluk, Prezidente Parlamentu Nasionál, Maria Fernanda Lay, hasoru malu ho Prezidente Repúblika, José Ramos Horta.
“Ha’u mai lori Orsamentu Jerál Estadu 2025 tanba iha hela prazu nia laran. Tuir loloos iha Parlamentu Nasionál to’o loron 25 maibé felizmente laiha proposta, ami bele konklui, ita hotu hatene katak maioria deputadu mós sei ba Oé-cusse ne’ebé ha’u hanoin asuntu ida ne’ebé di’ak, no fó tempu ba Prezidente Repúblika atu estuda Orsamentu Jerál Estadu 2025. Ha’u hanoin Primeiru-Ministru mak halo orsamentu, Primeiru-Ministru mai uluk ne’ebé ha’u lalika ko’alia barak, ha’u fó hatene prosesu la’o oinsá, laiha viola demokrasia, nein rejimentu embora husi opozisaun trata nune’e mais laloos. Ne’e mak ha’u husu ita aprova tiha guiaun, ita tenke komprieende saida mak guiaun ha’u la inventa,” nia relata.
PPN esplika, orsamentu ne’e iha nia prazu no iha audénsia mós iha nia prazu, dabate tenke iha loron tolu jeneralidade no loron 10 ba espesialidade, maibé ne’e prazu másimu se hotu antes tanba saida mak tenke hein.
“Ne’e mak ha’u hanoin iha prosesu, ha’u fó tempu barak liu ba opozisaun atu ko’alia, pelu kontráriu hanesan uluk to’o ha’u-nia proposta mós laiha buat ida, tanba Prezidente mak dirije ha’u respeita. Ha’u fiar katak Parlamentu Nasionál nia serbisu ne’e Konstitusionál no kumpre lei, ne’ebé ha’u labele pronunsia,” nia tenik.
Jornalista : Osória Marques
Editora : Julia Chatarina
