DILI, 26 novembru 2024 (TATOLI)–Governu Xina liuhusi ninia Embaixada iha Timor-Leste, hamutuk ho Fundu Nasaun Unida ba Labarik (UNICEF, sigla inglés) apoiu fasilidade eskolár ba Ensinu Báziku Sentrál (EBC, sigla portugés) Sérgio Viera de Melo, Becora, tanba eskola ne’e afetadu ba inundasaun iha tinan 2021.
Fasilidade eskolár sira mak hanesan kadeira hamutuk 2.000, kadeira no meza ba profesór 204, estudante livru 204 ba estudante no sasán eskritóriu oin-oin.
Embaixadora Xina iha Timor-Leste, Wang Wenli, hateten, Governu Xina no UNICEF entrega materiál ensinu aprendizajen ba eskola sira ne’ebé afetadu ba inundasaun iha tinan 2021, tanba ida-ne’e nu’udar apoiu rekuperasaun nia ba sira-nia prosesu aprendizajen.
“Entaun, tuir dadus ne’ebé iha, eskola hamutuk 34 mak afetadu ba inundasaun iha tinan 2021, iha Dili, Covalima no Bobonaro. Ida-ne’e nu’udár apoiu rekuperasaun ba sira-nia prosesu aprendizajen nian,” Embaixadora Xina iha Timor-Leste, Wang Wenli, hato’o iha resintu eskola, Becora, tersa ne’e.
Inisiativa ne’e atu ajuda setór edukasaun hodi harii no hametin hodi hasoru eventu ambientál ne’ebé maka’as hanesan inundasaun. Materiál ensinu aprendizajen sira ne’e apoiu estratéjia atuál sira Ministériu nian atu fó nafatin edukasaun ho kualidade inkluzivu ba labarik hotu.
“Iha abríl 2021 inundasaun iha Timor-Leste tomak hamosu estragu boot ba infraestrutura públika inklui eskola 34 no sentru formasaun ba profesor sira. Estragu ba edifísiu eskola nian, hamutuk ho faze materiál no mobiliáriu eskola perturba aprendizajen iha eskola sira ne’ebé afetadu. Sira ne’ebé afetadu presiza hetan asisténsia rekuperasaun no presiza apoiu atu harii sira-nia reziliénsia ba posibilidade dezastre naturál hanesan iha futuru,” nia akresenta.
Notísia relevante : F-FDTL apoia materiál didátika ba eskola EBC 01 no EBF Uaimori
Distribuisaun oferese materiál ensinu no aprendizajen ne’e hola parte iha programa Governu Xina nian, nune’e mós apoiu emerjénsia ba labarik sira hodi hatán ba inundasaun no COVID-19 iha Timor-Leste, ne’ebé fornese hela servisu nutrisaun, edukasaun inklui bee no saneamentu ho kualidade hodi apoia ema 146.000 ne’ebé afetadu.
“Xina no Timor-Leste nu’udar nasaun belun. Ami hein lote materiál ida-ne’e bele ajuda hadi’a kondisaun aprendizajen ba labarik Timor-Leste hodi apoia sira realiza sira-nia mehi no enkoraja sira atu sai ai-riin ba dezenvolvimentu nasaun,” nia tenik.
Apoiu ne’e hodi garante minimiza impaktu husi inundasaun ba kontinuidade aprendizajen labarik sira nian. Aleinde ne’e, komunidade ne’ebé afetadu husi inundasaun mós hetan apoiu ho asesu ba nutrisaun no bee he kualidade, saneamentu, no servisu ijiene.
Diretór Nasionál UNICEF, Patrizia Digiovanni, hateten, apoiu ida-ne’e hanesan onra no ksolok boot. Tinan-tolu ona dezde udan-boot tun iha Timor-Leste, husik hela destrisaun boot ida ba infraestrutura sira no tristeza, kauza ema na’in-42 resin mate.
Aleinde ne’e, nota mós katak investimentu dékada barak no lukru sira ne’ebé hetan ho susar iha setór edukasaun lakon durante dezastre ne’e.
“Rekuperasaun husi katástrofe ida ho natureza ida-ne’e presiza tempu no ezije responsabilidade koletiva sira. Eventu entrega ohin, tanba ne’e maka rezultadu ida husi viajen naruk ida-ne’ebé maka Ministériu Edukasaun lori ona hodi apoia rekuperasaun ne’ebé la’o hela iha eskola sira ne’ebé afetadu. Doasaun sira ho laran di’ak ida-ne’e husi Governu Xina sei ajuda tebes hodi prenxe nesesidade barak ne’ebé mosu husi destruisaun sira iha eskola sira tanba dezastre,” nia katak.
Doasaun ohin inklui meza no kadeira inklui sasán eskritóriu nian, ne’ebé sei ajuda labarik sira atu kontinua sira-nia edukasaun.
“Doasaun ida-ne’e hanesan lembransa ne’ebé maka’as, katak edukasaun maka direitu fundamentál ida ba labarik ida-idak. Asesu ba edukasaun fornese labarik sira ho estabilidade, estrutura, no sentidu normalidade durante tempu difísil sira. Ida-ne’e mós iha papél krusiál iha sira-nia moris di’ak emosionál no psikolójiku hodi ajuda sira atu hasoru trauma ne’ebé sira bele hetan,” nia katak.
Ministra Edukasaun, Dulce de Jesus, agradese ba Governu Xina no UNICEF tanba bele tulun ona eskola sira ne’ebé afeta ba inundasaun iha tinan 2021.
“Maski ita tama ona ba tinan 2024, maibé sira kontinua reforsa eskola ida-ne’e atubele rekupera filafali sasán sira ne’ebé mak lakon iha tinan hirak liubá, nune’e mós reforsa liután prosesu aprendizajen, ho ida-ne’e lori Governu Timor-Leste nia naran liuhusi Ministériu Edukasaun agradese ba UNICEF no Embaixada Xina ne’ebé sai parseiru durante tinan naruk hodi apoiu iha área oin-oin iha dezenvolvimentu kurríkulu, formasaun profesór inklui mós infrastrutura,” nia hato’o.
Jornalista : Osória Marques
Editora : Julia Chatarina
