BOBONARO,26 novembru 2024 (TATOLI) – Ministériu Administrasaun Estatál (MAE) liuhusi Diretór Nasionál Apoia Administrasaun Suku, Cesaltino Marques, tersa ne’e distribui motorizada unidade 100 ba suku 50 iha munisípiu Bobonaro hodi apoia no mellora di’ak liután servisu líder komunitária sira iha baze.
Motorizada hirak-ne’e unidade 50 marka (Verza) ba xefe suku sira no Revo ‘Hoda Fit’ unidade 50 ba Sekretáriu Suku sira hodi halo atividade operasionál.
Diretór Nasionál Apoia Administrasaun Suku, Cesaltino Marques, informa veíkulu hirak-ne’e distribui nu’udar kompromisu governu nia oinsá atu hametin no reforsa servisu administrasaun iha suku 452 nune’e líder komunitária no ofisiál suku sira bele sente hala’o servisu ho seguru.
Governu mós sei apoia tan ekipamentu eletróniku hanesan komputadór, printer ba suku sira hodi halo servisu ho efisiénsia no efikasia.
Notísia relevante: Governu entrega motorizada no uniforme ba xefe suku antes 28 Novembru
“Governu esforsu kria ona kondisaun iha instituisaun sira nune’e tuir mai governu ezije xefe suku sira atu hatudu prestasaun servisu, primeiru atendimentu ba komunidade sira tenke di’ak liután, transporte iha ona xefe suku sira bele hakbesik-an ba komunidade sira hodi rona sira-nia halerik, sira-nia nesesidade saida mak presiza Apoia,” nia ko’alia iha administrasaun munisípiu Bobonaro.
Nia husu ba xefe suku no funsionáriu suku sira atu utiliza motorizada hirak-ne’e ho kuidadu, nune’e bele uza ba tempu naruk.
“Motorizada ne’e uza ba halo atendimentu komunidade iha suku laran, tenke kumpre regra tránzitu, karta kondusaun tenke iha, depois labele uza motorizada ne’e ba atividade partidariu, labele uza ba negósiu, tanba ne’e uza xapa estadu, labele fó ba ema impresta, labele muda nia xapa,” nia fó hanoin.
Prezidente Autoridade Munisípiu Bobonaro, Alexandrino Pires, agradese ba governu sentrál tanba bele responde ona líder komunitária sira-nia preokupasaun durante ne’e.
Nia apela ba xefe suku no ofisiál suku sira atu atu labele utiliza motorizada ne’e ba atividade privada iha oras servisu.
“Imi tenke kuidadu halo di’ak, tanba haree ita-nia distánsia ho suku mai postu to’o munisípiu dook tebes,” nia akresenta.
Entertantu Xefe suku Goulolo, Tiago Laca Mali, sente kontente no promete sei utiliza motorizada ne’e ho responsabilidade tuir regra governu nia no regra tránzitu.
“Ami sente motorizada ne’e bele fasilita ona ami-nia servisu hodi atende komunidade ho di’ak liután, ami mós orgullu tanba governu fó mós motorizada operasionál ba ofisiál suku, ida-ne’e bele hakmaan ona ami-nia servisu iha suku,” nia agradese.
Enkuantu governu tinan ne’e distribui motorizada hamutuk unidade 904 ba suku hotu-hotu iha territóriu laran tomak.
Notisía relevante: MAE prepara motorizada rua ba kada suku iha territóriu
Jornalista: Sergio da Cruz
Editór: Evaristo Soares Martins
