COVALIMA, 26 Novembru 2024 (TATOLI) – Ministériu Interiór (MI) hamutuk ho Komandu Jerál PNTL sensibiliza Estatutu PNTL, liuliu kona-ba Promosaun Tranzitória, ne’ebé Prezidente Repúblika, José Ramos Horta, promulga ona ba polísia sira iha Covalima.
Xefe Gabinete Ministériu Interiór, hanesan mós xefe ekipa ba Promosaun Tranzitória PNTL, Paulo Assis Belo, dehan iha Estatutu PNTL, iha artigu 155, ko’alia kona-ba Promosaun Tranzitória diviza ba PNTL, tanba ne’e la presiza tuir teste bazeia ba regra normál, maibé hasa’e diviza liuhusi partisipasaun iha instituisaun.
Tuir Estatutu PNTL, iha iha artigu 155, hateten atu hasa’e diviza haree ba modalidade neen mak hanesan haree ba antiguidade PNTL liu tinan 10; membru libertasaun nasionál hanesan veteranu; polísia ne’ebé, durante krize 2006-2008, matéin no dezempeñu fusaun; polísia ne’ebé frekuenta kursu intensivu transitional training n.º 1 a n.º 8 no polísia ne’ebé frekuenta klase 1 to’o klase 2; polísia ne’ebé frekuenta klase 26 to’o klase 64, ho idade superiór tinan 50; no polísia ne’ebé, ho postu ajente ka subinspetór no ne’ebé dezempeña kargu xefia iha tempu Administrasaun Tranzitória Nasaun Unida iha Timor-Leste (UNTAET).
“Bazeia ba regra normál, bainhira atu hasa’e diviza presiza liuhusi teste, maibé daudaun ne’e iha artigu 155 bainhira atu hasa’e diviza la presiza liuhusi teste no halo de’it tranzitóriu”, esplika.
Komandante PNTL Covalima, Superintendente Polísia Calisto Gonzaga, informa katak rekursu PNTL iha Covalima hamutuk na’in-158 mak sei prienxe fixa no depende ba komisaun sira mak deside sé mak merese atu hetan promosaun diviza.
Nia salienta, durante ne’e instituisaun enfrenta hela problema hanesan membru PNTL balun serbisu liu tinan 10-14, maibé la hetan promosaun, balun veteranu maibé tuir teste no la pasa, balun komandante iha tempu UNTAET maibé sira-nia diviza ki’ik no membru balun tinan 50 ba leten, maibé la konsidera ho idade klase 1 to’o 25.
Tanba ne’e, Governu iha hanoin atu promove PNTL, liuhusi Promosaun Tranzitória hafoin tama iha faze promosaun normál ne’ebé atu hasa’e diviza ne’e presiza liuhusi teste.
Notísia relevante: Governu aprova revizaun estatutu ofisiál PNTL
Jornalista: Celestina Teles
Editora: Maria Auxiliadora
