OÉ-CUSSE, 26 Novembru 2024 (TATOLI) – Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) realiza, ohin, formatura konjunta hodi asegura komemorasaun Loron Proklamasaun Independénsia 28 Novembru iha Rejiaun Administrativa Espesiál Oé-Cusse Ambeno (RAEOA).
Komandante Operasaun Nasionál, Superintendente Xefe Polísia José Soares, hateten selebrasaun 28 Novmebru nu’udar eventu nasionál, tanba ne’e komandu rua husi PNTL no F-FDTL iha nivel nasionál apoia komandu RAEOA.
Tanba iha selebrasaun ne’e, komunidade, konvidadu tantu nasionál, estranjeiru komu lokál sei partisipa másima. Nune’e, iha semana kotuk, komandu simu ona kuadru legál ne’ebé fó kompeténsia ba forsa rua ne’e atu halo empeñamentu operasionál konjunta.
“Atu garante serimónia nasionál ne’e la’o ho trankilu no pás, ho ita-nia prezensa la signifika katak atu fó ameasa ba ita-nia komunidade, maibé atu hatudu katak komunidade hahú husi labarik to’o ferik-katuas no bainaka husi nasaun viziña atu mai tuir serimónia ne’e, ita garante seguransa ba sira”, nia dehan iha ámbitu formatura ne’e.
Notísia relevante: Primeiru-Ministru halo abertura ba feira 28 Novembru iha Oé-Cusse
Foto/Abílio Elo Nini
Aleinde ne’e, garante estrada públiku sira atu labele hamosu engarrafamentu, asegura bainaka iha sira-nia rezidensia no fatin eventu atu labele iha impedimentu ruma ne’ebé ho intensaun ka la ho intensaun.
“Tanba ne’e, forsa rua hatudu serbisu didi’ak ho profisionál, iha liña koordenasaun no komandu ida de’it, nune’e serbisu bele la’o ho di’ak. Susesu ne’ebé ita halo hatudu ona iha vizita Sekretáriu-Jerál ONU no vizita Papa Francisco mai Timor-Leste. Forsa rua demonstra ho kapasidade ne’ebé iha bele konvense no hatudu ba mundu ho prezensa komunidade sira-nian. Tanba ne’e, saida mak ita hatudu iha eventu ne’e mak koopera, dixplina no prezerva nafatin atu sai di’ak liután”, nia fó hanoin.
Komandante Operasaun Nasionál ne’e garante katak sei halo buat ne’ebé di’ak, nune’e komunidade bele partisipa serimónia 28 Novembru ho kontente no ho seguru.
Komandante PNTL Oé-Cusse, Superintendente Polísia Nicolau Francelino da Costa, hagradese ba komando jerál tanba bele reforsa serbisu iha Oé-Cusse.
“Husi nasonál bele koloka mai atu reforsa serbisu iha Oé-Cusse, tanba ema barak sei partisipa enatun seguransa iha papél atu asegura, nune’e ema hotu bele kontente ho selebrasaun ne’e”, nai dehan.
Notísia relevante: PNTL Oé-Cusse preparadu asegura komemorasaun 28 Novembru
Hafoin formatura konjunta husi forsa seguransa, PNTL kompostu husi Unidade Patrullamentu Fronteira (UPF), Batalãun Orden Públika (BOP) no F-FDTL kontinua halo patrullamentu konjunta hahú husi komandu PNTL, terminál Tono, Ponte Noefefan no kontinua bá to’o fronteira Sakato.
Jornalista: Abílio Elo Nini
Editora: Maria Auxiliadora
