DILI, 25 novembru 2024 (TATOLI)–Prezidente Republika (PR), Jose Ramos Horta, tersa ne’e, iha ámbitu serimónia selebrasaun proklamasaun independénsia ba dala-49, iha Palásiu Prezidensiál Bairru-Pité, kondekora medalla orden kolár Nicolau Lobato ba sidadaun na-in-107.
Antigu Kombatente, David Dias Mandati, konsidera, kondekorasaun ne’e hodi fó rekoñesimentu ba veteranu sira-nia luta ne’ebé durante ne’e kontribui ba ukun rasik-an.
“Serimónia kondekorasaun ne’e iha eventu selebrasaun loron proklamasaun independénsia Timor-Leste ba dala-49, hodi fó kondekorasaun ba sidadaun ne’ebé mak kontribui ba luta libertasaun nasionál Timor-Leste to’o hetan ukun rasik-an,” nia dehan liuhusi diskursu.
Notísia relevante : Deputada Julie Laiskodat sente onradu simu kondekorasaun husi PR Horta
Nune’e mós, Veteranu José Filomeno Siqueira ‘Tatoras’, apresia tanba ohin marka tan pasu importante ida tanba Prezidente Repúblika, Jose Ramos Horta, bele fó kondekoarasaun ba veteranu sira ne’ebé durante ne’e kontribui ba luta libertasaun nasaun.
“Sente kontente tanba momentu ne’ebá hanesan responsável másimu husi zona Na’in-Feto no sente kontente tanba ha’u-nia ema sira ikus-ikus ne’e simu hotu ona, maski idade avansadu no la’o labele, maibé bele mai to’o iha fatin ida-ne’e hodi simu medalla hodi hanoin kona-ba memória luta ne’ebé naruk,” nia akresenta.
José Filomeno louva, tanba maski maluk veteranu sira ho kondisaun moras, konsege mai hodi simu sira-nia direitu.
“Ha’u-nia ema sira mai iha ne’e ho lipa de’it mós mai agradese tanba tuir ita-nia kultura sira ne’ebé uza lipa mai duni ain tanan atu simu kondekorasaun iha Palásiu Prezidensiál, ne’ebé sente kontente liu,” nia katak.
Prezidente Repúblika, José Ramos Horta, hateten serimónia kondekorasaun ne’e la’ós atribui de’it ba timoroan sira maibé ba mós sidadaun estranjeiru balun ne’ebé mak fó kontribuisaun ba luta libertasaun Timor-Leste hodi hetan ukun rasik-an.
Jornalista : Osória Marques
Editora : Julia Chatarina
