DILI, 25 novembru 2024 (TATOLI)–Deputada Repúblika Indonézia (DPRI, sigla portugés), Julie Laiskodat, sente onradu bele hetan konvite husi Prezidente Repúblika (PR), José Ramos Horta, hodi simu kondekorasaun hanesan rekoñesimentu ba nia serbisu.
“Prezidente Repúblika, José Ramos Horta haree ami durante tinan-lima nu’udar Governadór Nusa Tenggara Timur (NTT), tanba Prezidente Repúblika bá antes no depois, tanba antes katuas seidauk sai Governadór, Prezidente Horta rasik haree baibain maibé bainhira kaer kargu nu’udar Governadór durante tinan-lima iha mudansa boot. Tanba ne’e mak Prezidente Repúblika hakarak buat ne’ebé ami halo iha NTT bele fahe esperiénsia mós ba iha Timor-Leste, no Prezidente rasik hateten, husi ibun de’it labele maibé kesi metin ho kondekorasaun, entaun ha’u-nia prinsípiu mós hanesan bainhira kesi metin ona labele ko’alia de’it maibé tenke serbisu no ha’u sente Prezidente Repúblika iha matenek atu kesi ha’u liuhusi kondekorasaun hanesan feto potensiál atu enkoraja mós feto iha Timor-Leste atu avansa atu dezenvolve família no nasaun,” Julie Laiskodat, hateten iha salaun Xina Palásiu Prezidensiál, Palásiu Governu, segunda ne’e.
Notísia relevante : Veteranu 188 simu kondekorasaun orden Nicolau Lobato iha Baucau
Nia haktuir, PR Horta antes ne’e bá sira-nia uma hanesan ondra ida, tanba laiha Prezidente Repúblika ida bele bá to’o ninia uma, ne’ebé sente hanesan ondra boot ida.
Iha biban hanesan, PR Horta informa, kondekorasaun ba veteranu sira iha Palásiu ne’e ninia lista mai husi Konsellu Kombatente Libertasaun Nasionál (CCLN, sigla portugés), hafoin atribui mós ba timoroan sira husi entidade oin-oin inkluidu estranjeiru balun.
“Hanesan deputada Parlamentu Indonézia nian, tanba ha’u haree nia serbisu iha Indonézia. Nia ho nia laen apoia Timor maka’as, agora sira na’in -rua tuur iha Jakarta hamutuk Parlamentu sira hakarak dada tan maka’as apoiu Indonézia mai Timor, relasaun metin liután. Depois ha’u ba férias iha Kupang, Rote, Sumba la’ós bá hanesan toba han de’it, pasiar maibé mós ba haree buat barak, haree hakiak boek, kadiuk, ikan buat oin-oin, haree no ko’alia ho sira atu sira halo iha Timor,” nia haktuir.
Jornalista : Osória Marques
Editora : Julia Chatarina
