DILI, 27 novembru 2024 (TATOLI)–Governadór Banku Sentrál Timor-Leste (BCTL, sigla portugés), Helder Lopes, kuarta ne’e, hasoru malu ho Prezidente Repúblika (PR), José Ramos Horta, hodi atualiza kona-ba servisu bankária no área finanseira.
“Inklui ami-nia supervizaun bankária no finanseira kestaun Fundu Minarai, sistema pagamentu nasionál no monitorizasaun ba Timor-Leste nian. Tanba ne’e mak ohin ha’u halo konversa iha área sira-ne’e, liu-liu liga ho jestaun Fundu Minarai, nune’e BCTL atualiza ba Prezidente Repúblika, katak ita-nia Fundu Minarai nia balansu agora biliaun $18,68, ninia retornu tinan ida-ne’e hamutuk biliaun $1,1, no totál osan ne’ebé Governu levanta ona ba despeza públika to’o novembru hamutuk biliaun $1,5,” Governadór BCTL, informa hafoin reuniaun ho Xefe Estadu, iha Palásiu Prezidensiál, Bairru-Pité.
Notísia relevante : BCTL fó sai Relatóriu Trimestrál Fundu Petrolíferu billaun $18.97
Aleinde ne’e, Governadór relata mós kona-ba estratéjia investimentu Fundu Minarai (Fundu Petrolíferu) ne’ebé daudaun atinje 65%.
“Ita investe iha títulu ka bons, depois 35% ita investe iha asaun, ida-ne’e mak ami diskute.
Aleinde ne’e ita ko’alia kona-ba dezempeñu ekonómiku, hanesan ita-boot sira akompaña, ita-nia kresimentu ekonómiku ba tinan 2023 ninian 2,4%, projesaun ba tinan 2024 sei sa’e ba 3,7%, ba tinan 2025 ita projeta ita-nia ekonomia sei sa’e ba 4,4%,” nia esklarese.
Kona-ba inflasaun sasán ninia folin sa’e iha tinan ne’e tanba impaktu husi polítika ekonómika oin-oin, tantu Governu no setór privadu sira.
“Ita-nia inflasaun jerál daudaun menus husi 3%, ida-ne’e mak situasaun ne’ebé atualiza husi setór finanseiru, servisu progresu boot ne’ebé daudaun ita-nia indústria finanseira atinje ka iha prosesu atinje mak promove dijtalizasaun finanseiru, liu-liu Banku Sentrál Timor-Leste husu ba banku no instituisaun finanseiru sira tenke kontinua promove servisu dijitál, liu-liu internet banking no mobile banking,” Helder Lopes, tenik.
Nune’e mós, BCTL mós sei kontinua servisu atu estabelese infraestrutura sistema hodi bele hahú promove sistema pagamentu dijitál bainhira sosa sasán ruma.
“Aleinde ita uza osan fíziku, ita mós bele uza ona instrumentu ka osan ho forma seluk, hanesan kartaun ka liuhusi telefone,” nia hato’o.
Fó sai mós katak, Fundu Minarai agora ne’e ho balansu biliaun $18,68 investe iha asaun no títulu iha rai-li’ur, entaun retornu ne’ebé hetan mak retornu finanseiru, labele hetan retornu ekonómiku no sosiál.
“Ita só hetan de’it ninia funan ho nia forma osan. Ohin iha mós diskusaun serake ita hakarak muda tiha ita wish capital hodi konsidera dada tiha osan balun mai investe ho maneira oin-oin, ne’e Governu nia kompeténsia maibé presiza hanoin serake osan iha Fundu Minarai ne’e bele dada balun mai hodi investe iha ita-nia rai, hodi ita hetan la’ós de’it retornu finanseiru, maibé retornu finanseiru, ekonómiku, no sosiál. Ita bainhira investe iha ita-nia rain ita bele hetan retornu tolu ne’e, maibé investe iha rai-li’ur entaun retornu finanseiru de’it mak ita hetan,” Governadór haktuir.
Helder Lopes dehan, Governu bele halo diskusaun kona-ba kestaun ne’e hodi deside konseitu di’ak liu no BCTL prontu atu koopera ho Governu, liu-liu Ministériu Finansa atu diskute asuntu ida-ne’e hodi dezeña polítika ida di’ak ba interese país.
Jornalista : Osória Marques
Editora : Julia Chatarina
