OÉ-CUSSE, 27 Novembru 2024 (TATOLI) – Kombatente sira iha Rejiaun Administrativa Espesiál Oé-Cusse Ambeno (RAEOA) agradese ba Estadu Timor-Leste, tanba fó valorizasaun ba sira-nia kontribuisun ba prosesu luta ba ukun rasik-aan.
“Governu iha inisiativa di’ak hodi kondekora ami simu medalla, tanba ami-nia partisipasaun durante iha prosesu funu laran maske ki’ik, maibé valoriza, maske ami la hasoru inimigu, maibé ami kontribui ba apoia sasán ba ita-nia luta-na’in sira iha ai-laran, liuhusi klandestina”, Tibertio Sasi Sosilo ho naran kódigu ‘Sasi’ husi grupu Santo António Oé-Cusse hato’o iha ámbitu simu medalla ne’e, iha otél Ambeno, ohin.
Iha sorin seluk, kombatente Cipriano António ‘Nikitkena’ husi suku Naimeko, dehan tinan barak sira hein no to’o Governu ida-ne’e mak foin fó rekoñesimentu ba sira.
“Foin rekoñese ami atu hetan kondekorasaun hodi simu medalla, tanba ami mós envolve iha prosesu luta ba ukun rasik-aan ne’e. Ohin, kondekora ha’u hanesan 8a14, ida-ne’e orgullu boot ba ha’u-nia rai Timor-Leste”, nia dehan.
Veterana Rosa Tefa ‘Fatuk’ husi suku Lela-Ufe, sub-rejiaun Nítibe, kontente tanba luta durante tinan 24 foin mak Estadu rekoñese nia hanesan lutadora ida.
“Valoriza ha’u-nia kontribuisaun ho medalla ida-ne’e hanesan valór boot mai, mai ha’u-nia moris tomak to’o ha’u-nia jerasaun tuirmai konta mós katak ha’u-nia inan kontribui ba ukun rasik-aan”, nia orgullu.
Aleinde ne’e, Adrino da Conçeição Colo husi suku Ban-Afi, nu’udar oan sente triste tanba nia aman ne’ebé kontribui ba luta oras ne’e fila ona ba Aman Maromak nia kadunan santu.
“Ha’u simu ha’u-nia aman Agostinho Tefa Colo nian. Ha’u nu’udar oan lahatene tanba uluk ha’u sei ki’ik sira luta ba ita-nia rai ne’e. Ohin, Estadu rekoñese ona, tan ne’e agradese ba ha’u-nia aman nia kontribuisaun no dedikasaun”, nia hato’o.
Konsellu Kombatente Libertasaun Nasionál kondekora kombatente na’in-288 iha Rejiaun Administrativa Espesiál Oé-Cusse Ambeno (RAEOA) ho orden funu-na’in no orden Nicolau Lobato.
Notísia relevante: Kombatente 288 iha Oé-Cusse kondekoradu ho orden funu-na’in no Nicolau Lobato
Jornalista: Abílio Elo Nini
Editora: Maria Auxiliadora
