OÉ-CUSSE, 27 Novembru 2024 (TATOLI) – Konsellu Kombatente Libertasaun Nasionál (CCLN, sigla portugés) kondekora kombatente na’in-288 iha Rejiaun Administrativa Espesiál Oé-Cusse Ambeno (RAEOA) ho orden funu-na’in no orden Nicolau Lobato.
Segundu Vise-Prezidente CCLN, Mário Nicolau dos Reis, hateten kondekorasaun ne’e bazeia ba dekretu Prezidente Repúblika númeru 116/2024 no Lei númeru 3/2016, loron 12 fulan-Abríl, kona-ba estatutu Kombatente Libertasaun Nasionál alterada husi Lei númeru 9/2009, 29 fulan-Juñu, no Lei númeru 2/2011, loron 23 fulan-Marsu, afirma kompromisu Estadu no sentidu rekoñese no valoriza esforsu Kombatente Libertasaun Nasionál.
“Orden ohin simu ne’e, rua de’it, ordeen funu-na’in ema na’in-ida no maioria sira-ne’e orden Nicolau ho grau 03. Ne’ebé, kondekorasaun ne’e hanesan prémiu ida ka valorizasaun ida-ne’ebé Estadu fó ba ita-nia timoroan sira-ne’ebé halo parte iha luta ba independénsia”, Mário Nicolau dos Reis dehan iha otél Ambeno, ohin.
Nia informa, sira balun seidauk simu, tanba foin rejista iha 2009, maibé sira-ne’ebé rejista iha 2003 to’o 2005 kuaze simu hotu ona no hela balun mak seidauk simu sira-nia direitu, tanba balun lakoi partisipa, maibe CCLN kontinua hein no rai hela medalla kondekorasaun, nune’e nia na’in bele simu.
Foto Tatoli/Abílio Elo Nini
“Agora sira rejista 2009, ami sei prosesa hela, parese tinan oin. Ami sei taka sai lista, sira-ne’ebé aprovadu ita sei fó kondekorasaun no fó mós sira-nia direitu ba iha pensaun bainhira sira hetan”, adianta.
Prezidente Autoridade RAEOA, Rogério Tiago Lobato, parabeniza kombatente sira hafoin simu rekoñesimentu no husu atu tane aas nafatin sentidu patriotizmu.
“Rekoñesimentu ba imi, ha’u haree tema hateten na’in ba ukun rasik-aan no riin ba nasaun. Sim, loos! Tanba ho imi-nia luta mak sai na’in ukun rasik-aan, imi ho imi-nia luta mak sai na’in ba Timor-Leste. Parabéns ba imi, tane aas imi-nia patriotizmu, hanorin imi-nia oan sira atu tuir dalan ida-ne’ebé liu ona, katak hadomi Timór no hadomi ukun rasik-aan”, nia hateten.
Rogério Lobato reprezenta Governu konvida veteranu sira hotu no kombatente libertasaun nasionál atu partisipa iha komemorasaun Loron Proklamasaun Independénsia 28 Novembru iha kampu 01 de Maio Palaban.
“Aban, komemora Loron Proklamasaun Independénsia 28 Novembru. Tau imi-nia medalla iha hirus-matan, bá hotu hamriik iha serimónia isár bandeira, hatudu katak ami mós kontribui ba ukun rasika-aan”, nia salienta.
Notísia relevante: 28 Novembru, tempu ba ukun-na’in no sidadaun hotu halo reflesaun – Padre Lúcio
Tuir livru C-3 Orsamentu Jerál Estadu 2023 RAEOA-ZEESM Timor-Leste, benefisiáriu ne’ebé hetan apoia osan Estadu iha RAEOA ba kombatente ou veteranu libertasaun nasionál hamutuk ema na’in-363 no martír libertasaun nasionál na’in-223.
Jornalista: Abílio Elo Nini
Editora: Maria Auxiliadora
