COVALIMA, 27 Novembru 2024 (TATOLI) – Servisu Saúde Covalima seidauk koloka médiku ba postu saúde 15 iha Covalima hodi atende pasiente sira, tanba daudaun ne’e falta rekursu umanu.
“Servisu Saúde Covalima seidauk koloka médiku ba iha postu saúde 15, tanba ne’e, foin lalais, loke konkursu públiku ba médiku ne’ebé presiza na’in-18, maibé ema na’in-haat de’it mak submete dokumentu, ida ne’e sai problema”, Diretór Servisu Saúde Covalima, Domingos Sequeira, informa iha Camnasa, ohin.
Dirijente ne’e husu ba Covalima oan sira tenke estuda maka’as, tanba postu saúde sira sei presiza médiku no realidade hatudu ema ne’ebé konkorre vaga atu koloka ba postu saúde sira ne’e menus.
Ministériu Saúde kria ona sentru saúde hitu iha postu administrativu hitu no postu saúde 24, husi númeru ne’e postu saúde 15 seidauk iha médiku.
Postu saúde sira ne’ebé iha ona médiku mak iha Matai, Labarai, Beco, Fatuleto, Raimea, Dato Rua, Dato Tolu, Gala no Lakonak.
Dirijente ne’e dehan Saúde Covalima hakarak destaka pesoál bá sentru saúde no postu saúde 24 atu halo atendimentu ba komunidade, nune’e bele alkansa meta iha implementasaun.
Tuir Konstituisaun iha artigu 57, ema hotu iha direitu atu asesu ba saúde, asisténsia médika, sanitária. Diploma ministeriál konjunta númeru 6/2018, 21 Marsu, Orgánika Servisu Munisipál Saúde no dekretu-lei númeru 3/2016, artigu 8, hateten regulmentu husi diploma ministeriál konjunta númeru 6/2018 fó kompeténsia ba servisu saúde sira hodi promove promosaun no edukasaun iha servisu saúde hodi kontrola moras iha populasaun sira, nune’e bele alkansa implementasaun ne’ebé efetivu.
Daudaun ne’e, pesoál saúde ne’ebé destaka ona bá sentru saúde no postu saúde sira hamutuk 289 kompostu husi médiku 26, parteira 49, enfermeiru 75, asisténsia enfermeiru 16, tékniku aliadu 3, saúde públika 54 no sira seluk ne’e 38.
Husi númeru pesoál saúde 289 ne’e, na’in-182 permanente no kontratadu 107 ne’ebé mak presta servisu iha Saúde Covalima.
Notísia relevante: Pesoál saúde 81 destaka ona iha postu saúde sira
Jornalista: Celestina Teles
Editora: Maria Auxiliadora
