COVALIMA, 27 Novembru 2024 (TATOLI) – Timor-Leste proklama ona nia independénsia ba da-49, maibé atu hetan independénsia ida ne’e povu sakrifika nia aan hahú iha 1975 to’o 1999.
Padre selebrante, Sebastião Eugénio Correia, hateten iha misa agradesimentu ba komemorasaun Loron Proklamasaun Independénsia Timor-Leste, 28 Novembru, iha Igreja Ave Maria Suai, ohin.
“Ita-nia povu uluk luta ho sira-nia sakrifísiu tomak, liuhusi serbisu hamutuk ho domin no fiar ba Maromak, ikus mai ita hetan independénsia ne’ebé ohin komemora ona ba da-49. Timor-Leste hetan nia independénsia, povu uluk unidade no povu hadomi malu, liuhusi domin hodi tau hamutuk forsa atu luta ba ukun rasik-aan, tanba ne’e Timor-Leste ohin loron hetan nia liberdade”, Pároko Ave Maria Suai hateten iha nia omília.
Saserdote ne’e husu atu povu presiza nafatin moris iha domin hodi alkansa independénsia ida-ne’e no buka atu luta ba moris, kesi unidade, tanba domin mak liberta povu husi inimigu sira.
“Ita fahe malu, laiha domin ba malu, dezenvolvimentu sei la la’o. Presiza tau forsa hamutuk hodi luta ba dezenvolvimentu”, nia fó hanoin.
Aleinde ne’e, povu presiza hasees-aan husi hahalok aat, tanba interese liu ba partidária no polítika halo povu hatudu laran-aat ba malu, entaun presiza atu perdua malu, tau forsa hamutuk hodi luta ba dezenvolvimentu iha país.
“Timór independénsia ba da-49 ona. Tinan oin proklama nia independénsia ba da-50, nafatin atu banati tuir unidade uluk iha 1975, presiza kesi nafatin iha ukun rasik-aan, tanba unidade mak forsa ba ita hodi liberta ita husik ki’ak no mukit”, nia hateten.
Covalima presta omenajen ba erói sira iha Monumentu Masakre Setembru Negro
Hafoin misa agradesimentu ba komemorasaun Loron Proklamasaun Independénsia ba da-49, autoridade no povu Covalima la’o ain husi igreja Ave Maria Suai to’o iha momentu Masakre Setembru Negro 1999 hodi kari ai-funan, símbolu presta omenajen ba erói sira ne’ebé fó aan ba mate hodi buka ukun rasik-aan.
“Ita hatene tinan 49 Timor-Leste proklama ona independénsia, ita hanoin hikas ita-nia ukun rasik-aan. Atu hetan ukun rasik-aan barak mak sai oan-ki’ak, inan-faluk no vítima”, Prezidente Autoridade Covalima, Miguel Armada Cardoso, dehan iha momentu Masakre Setembru Negro, ohin.
Prezidente autoridade ne’e fó hanoin ba antigu estrutura no organizasaun masa sira no komunidade atu akompaña no partisipa selebrasaun 28 Novembru.
“Ita tau ai-funan hanesan presta omenajen no hatudu ita-nia domin, agradese, tanba erói sira-nia sakrifísiu hodi sosa independénsia ida-ne’e no ohin loron ita hetan ukun rasik-aan”, dehan.
Iha sorin seluk, xefe suku Camnasa, Fernando Noronha, hateten Loron Proklamasaun hanesan loron importante ba povu hodi hanoin hikas istória pasada, ne’ebé uluk erói sira sakrifika sira-nia aan ba mate.
“Erói sira fakar raan hodi husik hela ita, tan ne’e mak 28 Novembru ita komemora ho atividade isár bandeira”, Fernando Noronha dehan iha igreja Ave Maria Suai.
Tanba ne’e, tuir líder suku, Timor-Leste proklama ona nia independénsia ba da-49 no presiza moris iha unidade no oinsá atu halo dezenvolvimentu iha nasaun.
Abitante Angelino do Carmo reforsa mós katak presiza atu partisipa komemorasaun loron nasionál sira, nune’e bele hatene istória erói sira luta ba independénsia. “Timor-Leste komemora aniversáriu Loron Proklamasaun Independénsia da-49 ona, loron ida ne’e sai hanesan pontu ne’ebé mak aas ba povu sira iha Timor-Leste hodi hetan independénsia. Timor-Leste nia ukun rasik-aan la’ós mai mesak, maibé liuhusi sakrifísiu ne’ebé hakerek ho raan no intimidasaun oioin ne’ebé akontese iha momentu ne’eba”, nia relembra.
Rekorde katak, iha 28 Novembru 1975, FRETILIN halo proklamasaun unilaterál independénsia ho primeiru Prezidente Repúblika mak Francisco Xavier do Amaral, no Nicolau Lobato simu kargu hanesan Primeiru-Ministru no ikus fali mai sai mós hanesan primeiru líder Rezisténsia Armada.
Orsamentu ba komemorasaun 28 Novembru iha Covalima hamutuk $8.551, ne’ebé fahe ba postu administrativu hitu $4.500 no kada postu aloka $750 hodi selebra loron ne’e.
Notísia relevante: Autoridade Covalima aloka rihun $7-resin ba komemorasaun 28 Novembru
Jornalista: Celestina Teles
Editora: Maria Auxiliadora
