Governu presiza tau-matan ba infraestrutura bázika
BOBONARO, 28 novembru 2024 (TATOLI) – Iha kmemorasaun loron Proklamasaun Independénsia 28 novembru ba da-49, Kombente Libertasaun Nasionál, Munisípiu Bobonaro, Júlio Verdiál Barros ‘Lia ba Oin’, rekomenda ba governu atu kontinua tau-matan ba infraestrutura bázika, tanba povu iha baze sei halerik ba estrada, eletrisidade no bee-moos.
“Fó hanoin ba ita-nia estadu, liuliu ba IX Governu ne’ebé mak agora lidera ita-nia nasaun ho povu ida-ne’e, oinsá mak atu lori dezenvolvimentu ba to’o iha baze, tanba ita nia inan-aman sira iha área rurál sei sei moris ho situasaun ida ke susar,” nia informa ba Jornalista sira, hafoin partisipa komemorasaun loron Proklamasaun Independénsia 28 Novembru ba da-49 iha kampu Futeból Maliana, kinta ne’e.
Eis Primeiru Vise Juventude Sub-rejiaun Bobonaro ne’e mós rekomenda ba governu atu tau prioridade ba setór importante sira hanesan agrikultura, edukasaun no saúde.
“Tuir ha’u-nia hare ita la’ós dehan di’ak liu, la’ós dehan ladi’ak liu, maibé presiza ninia kontinuasaun husi primeiru governu to’o IX governu, durante ne’e governu responde ona buat balu, maibé ita hotu-hotu haree ida ne’ebé mak prioridade liu mak sira halo, dalaruma sira mós lato’o iha baze, tanba iha baze ne’e ita komunidade atu mai munisípiu de’it mós ladi’ak, tanba estrada ladi’ak, ita-nia komunidade mós balu mós la asesu eletrisidade no edukasaun mós profesór sei menus,” nia fó hanoin.
Sorin seluk, Joventude Munisípiu Bobonaro, Armando da Cost, sekunda durante tinan 24 dezenvolvimentu ba setór ekonomia, edukasaun, saúde no hatudu iha nasionál no munisipiu la’o ho progresu natoon.
“Ohin ita fokus ba dezenvolvimentu, ita haree 8% mak la’o ona, iha barak mak seidauk la’o, maibe ita-nia líder rezisténsia sira husi 75 mak sei kontinua lidera nasaun ida-ne’e, ha’u fiar katak sira sei luta nafatin ba dezenvolvimentu,” nia hateten.
Notísia relevante: Postu Bobonaro selebra 28 Novembru ho kompetisaun futeból-kultura
Jornalista: Sérgio da Cruz
Editór: Evaristo Soares Martins
