BOBONARO, 15 novembru 2024 (TATOLI) – Autoridade Postu Administrativu Bobonaro, Munisípiu Bobonaro preparadu atu realiza kompetisaun desportu komunitária modalidade futeból sub 10-14 no kompetisaun kultura Tebe-Tebe ho baku Likurai hodi selebra loron Proklamasaun Independénsia 28 Novembru tinan 2024 ba da-49.
Administrador postu administrativu Bobonaro, Tomás Barreto Henriques, informa, serimónia hasa’e bandeira no atividade seluk tán, iha segunda semana oin mak foin realiza enkontru atu forma komisaun organizadora, maibé ba programa rua hanesan desportu komunitária no kompetisaun kultura, hein de’it atu implementa tanba hetan ona apoia orsamentu husi Ministériu Juventude, Desportu, Arte no Kultura no Sekretaria Estadu Arte Kultura.
Notisía relevante: Autoridade Bobonaro aloka rihun $18 hodi komemora Loron Proklamasaun Independénsia
“Atividade rua ne’e ho nia orsamentu ketak-ketak, ida-ne’e inisiativa administradór postu ho funsionariu sira iha-ne’e trasa hanoin, ami halo proposta ida hetan duni proposta husi MJDAK ba SEAK ho ninia asuntu la hanesan, ida mak tebe-kultura no ida mak desportu komunitária,” nia informa ba TATOLI, iha kna’ar fatin, sesta ne’e.
Autoridade postu tau priodade hodi realiza eventu futeból ba labarik sira oinsá atu muda sira-nia mentalidade atubele koñese malu, hatudu talentu, tátika jogu nune’e bele identifika fini jogadór foun.
Nia hatutan, kompetisaun kultura ne’e realiza ho objetivu atu promove identidade kultura orijinál.
“Ita-nia tebe-tebe avo bei-ala sira hela ba ita naturál mak ida-ne’ebé, ha’u-nia hanoin ba komisaun sira katak atu labele halo modernu, naturál de’it, sira tenke tau tais, sira tenke ai-tanan, uza hela lesu hatudu duni ita-nia identidade. Ida-ne’e mak importante atu nune’e ita-nia joven sira bele kontinua ita-nia kultura,” nia katak.
Nia husu ba komunidade suku 18 atu partisipa másimu iha serimónia hasa’e bandeira ba selebrasaun loron importante ne’e.
“Ita atu fó onra ba ita-nia eroi no eroína sira, ne’ebé sakrifika sira nia-aan ba rai ida-ne’e tanba ho loron ida-ne’e mak ita goza ita-nia independénsia,” nia hateten.
Enkuantu postu administrativu Bobonaro hetan alokasaun orsamentu husi Autoridade Munisípiu Bobonaro no Governu Sentrál hamutuk $3,500, husi montante ne’e $1,500 fahe ba suku, kada suku sei hetan $100.
Nune’e mós $2,500 ba postu administrativu hodi finansia serimónia hasa’e Bandeira no atividade sira seluk tán ne’ebé sei trasa.
Notisía relevante: PM Xanana ho Xefe Estadu diskute preparativu ba komemorasaun 28 Novembru
Jornalista: Sérgio da Cruz
Editór: Evaristo Soares Martins
