DILI, 14 novembru 2024 (TATOLI) – Primeiru-Ministru (PM), Kay Rala Xanana Gusmão, kinta ne’e, iha Palásiu Prezidensiál Dili hasoru malu ho Prezidente Repúblika, José Ramos-Horta, hodi ko’alia kona-ba preparasaun Governu nian ba komemorasaun aniversáriu Proklamasaun Independénsia ba dala-48 ne’ebé sei hala’o iha Reziaun Administrativu Espesiál Oé-Cusse Ambeno (RAEOA).
“Ami na’in-rua ko’alia kona-ba selebrasaun 28 de Novembru ne’ebé sei hala’o iha Oé-Cusse, kona-ba preparasaun la’o hela, maibé bainaka sese mak atu mai ida ne’e ami sei haree hamutuk hela depois fó sai ba públiku,” Xanana Gusmão hateten ba jornalista sira hafoin remata reuniaun ho Xefe Estadu.
Iha parte seluk Xefe Governu aprezenta mós ba Prezidente Repúblika kona-ba rezultadu vizita traballu ba iha li’ur hanesan, Nove Iorke, Laos no Indonézia.
“Ha’u mós informa ba Prezidente kona-ba ha’u nia viajen sira durante ne’e ba li’ur hanesan Nova Iorke, Laos no Indonézia, ida ne’e mak ha’u informa ba Prezidente,” Xefe Governu afirma.
Aleinde ne’e parte rua ko’alia mós kona-ba maturidade Arte Marsiál nian ne’ebé dadaun ne’e di’ak tebes.
“Reuniaun ne’e Prezidente Repúblika apresia tebes ho Arte Marsiál sira ne’ebé hatudu maturidade di’ak tebes, ita la haree ona problema iha fatin-fatin, tenke mantein nafatin hanesan ne’e ba oin,” PM Xanana afirma.
Notisia relevante:Kampu 01 de Maio Palaban fatin ba komemorasaun 28 Novembru
Jornalista: Hortencio Sanchez
Editór: Florencio Miranda Ximenes
