BOBONARO, 14 novembru 2024 (TATOLI) – Autoridade Munisípiu Bobonaro hamutuk komisiaun organizadora, kinta ne’e realiza enkontru daruak preparasaun ba realiza eventu komemorasaun loron istóriku Proklamasaun Independénsia 28 Novembru ba da-49 ne’ebé nível munisipál sei gasta orsamentu rihun $18.
Orsamentu ne’e distribui ba postu administrativu Atabae, Balibo, Cailaco no Loloto’e $6000, kada postu $1,500, enkuantu postu Bobonaro hetan $2000 no Maliana $9000.
Tema prinsipál ba loron nasionál ne’e mak “Orgullu ba ita-nia identidade no kultura, ita harii futuru liberdade, justisa no esperansa ba ita-nia povu.”
Sekretáriu Autoridade Munisípiu Bobonaro ba Asuntu Planeamentu no Dezembolvimentu Integradu Munisipál, Semedo Laco, informa, ho atividade ne’ebé sei prienxe mak hanesan hasa’e Bandeira Nasionál, animasaun, kultura kada suku liuhusi aprezentasaun dansa kultura hanesan tebe-tebe no aktvidade desportu komunitária entre instituisaun ne’ebé la’o kuaze fulan ida ona.
Notísia relevante: Autoridade Covalima aloka rihun $7-resin ba komemorasaun 28 Novembru
“Serimónia ne’e ita realiza iha postu hotu-hotu, idak-idak konsentra iha-ne’ebá, ita bolu ona administradór sira mai enkontru, sira halo ona enkontru preparativu nível postu, sira mós prepara komisaun atividade saida mak atu realiza, postu Maliana mak ita konsentra nível munisípiu,” nia ko’alia iha salaun enkontru Autoridade munisípiu Bobonaro.
Biban ne’e, Semedo Laco lori Prezidente Autoridade Munisípiu Bobonaro nia naran, konvida komunidade no entidade hotu atu partisipa iha selebrasaun importante ne’e hodi valoriza no fó onra ba eroi no mártir sira-ne’ebé dedika sira nia-aan mate ba ukun-aan.
“Ida-ne’e loron ita-nia, loron povu nia, ho loron ida-ne’e mak ohin ita bele sente ukun-aan ne’e, 28 Novembru ita-nia eroi sira, maske unilateralmente sira proklama, ita defende ohin loron ita hetan ukuna-aan, livre sai nasaun independente iha mundu,” nia katak.
Notisía relevante: Kampu 01 de Maio Palaban fatin ba komemorasaun 28 Novembru
Jornalista: Sérgio da Cruz
Editór: Evaristo Soares Martins
