OÉ-CUSSE, 28 Novembru 2024 (TATOLI) – Ministériu Justisa (MJ) atribui, ohin, sertifikadu títulu na’in ba rai ba ema na’in-19 no instituisaun públika 10 iha Rejiaun Administrativa Espesiál Oé-Cusse Ambeno (RAEOA).
Diretór-Jerál Ministériu Justisa, Lúcas da Costa, hateten atribuisaun ne’e tuir planu estratéjiku ministériu nian hodi kumpre polítika no programa Governu nian atu atribui títulu na’in ba rai.
Tanba ne’e, benefisiáriu ne’ebé simu hamutuk na’in-29 – parsela na’in-10 ba koletivu rai Estadu no na’in-19 partikulár ka rai privadu.
“Sertifikadu ne’e sei fó vantajen barak. Ida importante liu mak fó seguransa jurídiku, katak kuandu entrega sertifikadu ba ema ida, rai ne’e ninian ona. Estadu nein ema ida sei la book, tanba rai ne’ebé nia hela ba iha ona seguransa legal. Ba futuru ema atu hadau karik bele hatudu ba tribunál katak ne’e rai privadu”, nia esplika iha Oé-Cusse, ohin.
Diretór Terra no Propriedade RAEOA, Júlio Coel, hateten benefisiáriu na’in-19 ne’e mai husi sub-rejiaun Nítibe no husi Pante Makasar, liuliu husi suku Cunha, Naimeko, Lifau no Taiboko.
“Atribuisaun ne’e nu’udar faze daruak. Primeiru, iha 2022 hamutuk família neen no tinan ne’e 29. suku sira seluk seidauk tanba ne’e ba oin ekipa téknika sei kontinua rekolla nune’e bele hetan sira-nai direitu títulu ba rai”, dehan.
Nia salienta atribuisaun ne’e tanba prienxe ona rekizitu hahú husi levantamentu dadus husi ekipa téknika Servisu Nasionál Kadastru (CNC, sigla portugés) nian no públika ona iha loron 90 atu ema bele reklama ka halo kontestasaun ka la’e.
“Maibé durante loron 90 laiha, tanba ita hakat ba faze atribuisaun mak ohin iha asiste daudaun”, nia hateten.
Nia salienta sertifikadu títulu na’in ba rai ba iha instituisaun 10 mak hanesan Tribunál Primeiru Instánsia Oé-Cusse, Defensór Públika, Ministériu Públiku, Diresaun Terra no Propriedade iha rua, Rejistu Notariadu, futuru edifisíu Administrasaun RAEOA, PNTL, Departamentu Solidariedade Sosiál no Gabinete Prezidente Autoridade iha rua.
“Sira-ne’ebé seidauk hetan, ha’u hanoin ne’e planu Governu nian, sei iha faze tuirmai, tanba iha Oé-Cusse, foin hetan títulu rai iha 2022 hamutuk família neen, ne’ebé Oé-Cusse hetan ona sertifikadu 25 ba komunidade no edifísiu públiku 10”, nia realsa.
Notísia relevante: Governu lansa atribuisaun sertifikadu títulu na’in ba rai iha Oé-cusse
Jornalista: Abílio Elo Nini
Editora: Maria Auxiliadora
