BOBONARO, 28 novembru 2024 (TATOLI) – Iha ámbitu komemorasaun loron Proklamasaun Independénsia 28 novembru ba da-49, Prezidente Autoridade Munisípiu Bobonaro, Alexandrino Pires, husu ba foinsa’e sira atu fó kontribuisaun másimu ba pás no estabilidade hodi fó apoia ba Governu halo dezenvolvimentu iha rai-laran.
“Ha’u-nia mensajen ba joven sira halo kontribuisaun, liuliu ba estabilidade, pás ne’e mak importante, hanesan Prezidente Autoridade Munisípiu Bobonaro, ha’u sura mós ho imi iha dezenvolvimentu nia laran, tantu iha fíziku ho non-fíziku, kapasitasaun no mós esforsu tomak autoridade sei hala’o,” nia informa ba Jornalista sira iha kampu Futeból Maliana.
Nia apela ba joven sira atu prepara-an tuir kursu língua no seluk tan tanba governu mós loke oportunidade barak ba asesu bolsu estudu iha rai-laran no rai-liur.
Autoridade Munisípiu Bobonaro mós sei koordena ho Governu oinsá atu rezolve joven sira-nia problema kona-ba kampu traballu.
“Joven mak lutu, joven mak pás, entaun ita planu nune’e envolve sira iha laran, agora daudaun esforsu iha komunikasaun ho país sira seluk, espera katak iha tempu badak ita sei realiza,” nia dehan.
Alexandrino observa katak, durante juventude nia kontribuisaun to’o médiu ona tanba konsege kria grupu oinoin hanesan grupu juventude hadomi pás, hadomi dezenvolvimentu no seluk tan inklui envlve-an iha atividade desportu.
Komunidade suku Holsa, Bendita de Jesus, sente kontente no haksolok partisipa iha serimónia importante ne’ebé realiza ho atividade oinoin.
“Nudar sidadaun ha’u sente importante liu mak ichar Bandeira Nasionál, tanba ohin ami mai iha-ne’e atu fó onra ba ita-nia eroi sira ne’ebé iha períodu rezisténsia dedika sira nia-an mate ba libertasaun povu tomak iha Timor-Leste, ohin loron ita bele goza iha ukun-an.”
Enkuantu komemorasaun loron importante ne’e Munisípiu Bobonaro realiza nível munisipál iha Kampu Futeból Maliana.
Notisía relevante: Autoridade Bobonaro aloka rihun $18 hodi komemora Loron Proklamasaun Independénsia
Jornalista: Sergio da Cruz
Editór: Evaristo Soares Martins
