DILI, 28 novembru 2024 (TATOLI)–Prezidente Autoridade Munisípiu (PAM) Dili, Gregório Saldanha, husu ba populasaun sira iha kapitál Dili atu iha konsiénsia hodi soe lixu iha lixeira sira-ne’ebé Governu konstrui ka hatuur koixote lixu iha kada bairru ka fatin públiku sira-ne’e.
“Primeiru, buat simples ida lixu ne’e ita tenke kontribui, prejudika ema barak no buat kiik-oan ne’e ita tenke rezolve. Ha’u, Prezidente Autoridade Munisípiu Dili no ha’u-nia kolega sira labele rezolve, se la’ós ita hotu-hotu nia responsabilidade,” Prezidente Autoridade Munisípiu Dili, Gregório Saldanha, hateten ba jornalista sira iha hafoin partisipa serimónia isar bandeira ba loron proklamasaun independénsia unilaterál ba da-49 (28 novembru 1975-28 novembru 2024) iha resintu prizaun Becora, kinta ne’e,
Nia sujere, ba ema hotu katak Díli labele hela ho preokupasaun lixu hodi tinan tomak nia laran, nune’e mak Timor-Leste sei la la’o ba oin.
“Ita tenke iha konsiénsia soe lixu. Ha’u hanoin, ita-nia uma laran lakohi sai foer,” nia hateten.
Autoridade Munisípiu Dili ne’e lamenta tebes ba aktu populasaun sira-nian ne’ebé kontinua soe lixu arbiru iha fatin arbiru, maske Governu esforsu ona halo sensibilizasaun ba populasaun kona-ba oinsá soe lixu ho saudável.
Maske, nia dehan, iha ona lixeiru ne’ebé autoridade munisipal koloka iha fatin públiku hodi soe lixu hoadi soe lixu ba laram, maibé popupasaun barak mak laija konsiénsia hodi soe lixu iha lixeira nia sorin-sorin no husik lixu naklekar ba-mai.
“Ha’u haree triste tebes. Ita la fó valór ba eroi sira no independénsia ida-ne’e, se ita nafatin laiha konsiénsia hodi soe lixu arbiru,” nia dehan.
Jornalista : Jesuína Xavier
Editór : Cancio Ximenes
