SINGAPURA, 02 dezembru 2024 (TATOLI)—Vise-Prezidente Komérsiu Indústria Timor-Leste (CCI-TL), Hergui Luina Alves no Prezidente Federasaun Manufatura Singapura, Lennon Tan, asina nota kooperasaun ba investimentu iha Timor-Leste, iha área oin-oin.
Kooperasaun ne’e asina iha ámbitu fórum komérsiu no investimentu ba dala-haat, ne’ebé realiza husi Governu Timor-Leste, iha Singapura.
“Ita-nia espetativa ba fórum ohin ne’e, liuhusi parseria ida-ne’e hodi hahú promove entre empreza timoroan ho Singapura ba oportunidade investimentu para esplora liuhusi investimentu ruma ne’ebé empreza Singapura bele investe iha Timor-Leste nomós esporta produtu ruma mai Singapura,” Vise-Prezidente CCI-TL hateten hafoin serimónia asina nota kooperasaun, iha Otél Pan Pacific Singapure, segunda ne’e.
Notísia relevante : Governu Timor-Leste realiza fórum komérsiu no investimentu iha Singapura
Nia dehan, nota kooperasaun ne’e ho kompromisu katak parte rua prontu serbisu hamutuk bainhira fila husi Singapura no automátikamente atualiza no tau publisidade kona-ba setór prioritáriu sira.
Federasaun Manufatura Singapura hanesan mós CCI-TL, ne’ebé hanesan mahon ba empreza sira ne’ebé halo produsaun ba manufatura iha Singapura.
“Hein nia prosesu hotu-hotu tanba fiar katak empreza Timor-Leste bele inklina iha laran. Sira presiza materiál primária ne’ebé ita-nia rai fornese. Tanba sira iha koñesimentu lubuk ida ne’ebé sei aplika iha Timor-Leste. Pusibilidade potensialidade ne’ebé sei halai ba setór hotu-hotu iha manufatura nian. Ami-nia esperansa mak ohin asina nota entendimentu ne’e mak ita promove ita-nia empreza nasionál sira no liuhusi koñesimentu Singapura nian ba empreza timoroan no iha mesmo tempu ita haree mós ba potensialidade esportasaun hodi bele esplora ba asesu merkadu,” nia akresenta.
Iha biban hanesan, Prezidente Federasaun Manufara Singapura, Lennon Tan, hateten, Singapura iha esperiénsia no konetividade ligadu ho infraestrutura.
“Ita-nia esperiénsia kona-ba enerjia renovável no solusaun boot bele ajuda harii futuru sustentável. Nune’e mós Singapura iha konetividade ho infraestrutura avansadu sira, nune’e bele fornese portaun ida ba empreza sira atu asesu ba merkadu internasionál sira tanba Singapura nia úniku ne’ebé iha mak liuhusi investe iha dezenvolvimentu abilidade no formasaun lideransa. Ita bele fó kbiit ba jerasaun emprezáriu no profisionál sira tuir mai atu haka’as-an hodi envolve lalais iha paizajen globál,” nia relata.
Jornalista : Osória Marques
Editora : Julia Chatarina
