VIQUEQUE 02 dezembru 2024 (TATOLI)-Empreza Donkame husi Japaun, segunda ne’e, entrega transporta karreta ho marka Suzuki ba Prezidente Autoridade Munisípiu (PAM) Viqueque hodi apoia servisu saneamentu iha munisípiu Viqueque.
Prezidente Autoridade Munisípiu (PAM) Viqueque, Francisco Cruz Simões De Gonzaga Soares, husu agradese ba empreza donkame ne’ebé durante ne’e implementa projetu uma lixu nian iha munisípiu Viqueque hodi komunidade sira rai lixu ba uma ne’ebé donkame prepara ona.
Notisia relevante :Empreza Donkame oferese uma lixu unidade 10 ba Caraubalu Viqueque
“Ha’u sente empreza donkame mai implementa projetu iha munisípiu Viqueque hodi hari’i uma lixu ida-ne’e fó benefísiu ba povu, atu halibur lixu ba laran. Nune’e ba oin ami sei tau atensaun no ami iha diresaun saneamentu hodi halo kontrolu ba uma lixu sira-ne’e, ho apoia sira-ne’e atu reforsa servisu saneamentu”, PAM Viqueque, Francisco Cruz Simões De Gonzaga Soares, hateten, iha resintu munisipál, ohin.
PAM Viqueque ne’e dehan, ambiente munisípiu sai moos, autoridade lokál sira nafatin fó hanoin ba komunidade sira atu labele so’e arbiru no lixu tenke rai iha uma lixu ne’ebé maka empreza donkame prepara ona.
“Ita hakarak ita-nia ambinte sai moos presiza ita ida-idak nian kontribuisaun no konsiensia rasik, atu labele so’e lixu arbiru. Tanba ne’e ha’u husu ba autoridade suku sira fó hanoin ba komunidade labele so’e lixu arbiru, so’e iha fatin lixu, atu nune’e ita-nia ambiente moos”, nia afirma.
Iha serimónia entrega fasilidade ne’e ekipa empreza donkame entrega ofisial karreta marka Suzuki ba PAM Viqueque no entrega tutan ba diresaun Servisu munisipál Agua Samentu no Ambiente (SMASA).
Hafoin ramata entrega karreta ne’e, Diretór Servisu Munisipál Agua Samentu no Ambiente (SMASA), Gulhermino Gomes Soares, afirma fasilidade ne’ebé empreza Donkame entrega ba Diresaun SMASA, hodi tau matan ba uma lixu 15 iha sidade Viqueque.
“Ho apoiu transporte ida-ne’e ami bele uza hodi rekolla lixu sira-ne’ebé komunidade sira so’e iha uma lixu sira. Nune’e lixu sira-ne’e ita bele konsentra iha armazen lixu ne’ebé lokaliza iha área Siralari, suku Caraubalu. Hafoin kontonua transporta ba Dili hodi prosesa ba resiklajen (dahur ulang) sai fali materiál foun ida”, katak.
Ho apoia ne’e karreta ida, laptop ida no makina imprime ida atu Diresaun SMASA utiliza. Enkuantu daudaun ne’e funsionáriu SMASA hamutuk na’in-11.
Notisia relevante :Empreza Donkame oferese uma lixu unidade 10 ba Caraubalu Viqueque
Jornalista : Vitorino Lopes da Costa
Editór : Florencio Miranda Ximenes
