COVALIMA ,02 Dezembru 2024 (TATOLI) – Ministra Solidariedade Sosiál no Inkluzaun, Verónica das Dores, fahe nesesidade bázika ba família vulneravel no ba ema ho defisiénsia (EhD) hamutuk 219, iha suku Matai, postu administrativu Maucatar, munisípiu Covalima.
“Ami halo distribuisaun nesesidade bázika ba família sira ne’ebé presiza. Família sira ne’ebé hetan apoiu ne’e identifika husi xefe aldeia sira. Ami mai apoia ai-han suplementár ba família vulneravel no ema ho defisiénsia”, governante ne’e dehan iha suku Matai, ohin.
Objetivu fahe nesesidade bázika ne’e hanesan parte-ida hodi komemora mós Loron Proklamasaun Independénsia ba da-49 hodi hanoin istória pasada no ba família sira ne’e presiza duni atu hetan apoiu husi Governu.
Programa distribuisaun nesesidade bázika ne’e hala’o ona iha munisípiu Ermera, iha Rejiaun Administrativu Espesiál Oe-Cusse Ambeno (RAEOA) no Covalima.
Nesesidade ne’ebé família vulneravel sira simu mak foos ho marka Gostu Loos kilógrama (kg) 25, koto 1kg, fore-mungu 1kg, susu enaak, dancow, sardine, mina no seluk tan.
Xefe Suku Matai, Nuno José Perreira, klarifika ba família vulneravel ne’ebé nia naran seidauk rejista labele laran-taridu, tanba família ne’ebé hetan ona apoiu la’ós xefe suku ho nia estrutura mak rekolla dadus, maibe haree ba sira-nia situasaun sira presiza atu hetan tulun ho urjente.
“Ba futuru ita sei halo mudansa di’ak liután ba apoiu ba inan-faluk sira no ba família ema ho defisiénsia sira atu hetan apoiu ai-han ne’ebé sira presiza”, nia adianta.
Família vulneravel José Gusmão sente satisfeitu bainhira Ministra Solidariedade distribui nesesidade bázika, nune’e sira bele aguenta han ba loron ida ka rua nian.
“Ami kontente tanba Governu bele ajuda ami maske nia kuantidade ladún barak, maibé bele aguenta moris”, nia dehan.
Notísia relevante: Ema ho defisiénsia 54 iha Tilomar simu nesesidade bázika
Jornalista: Celestina Teles
Editora: Maria Auxiliadora
