DILI, 02 dezembru 2024 (TATOLI)–Diretór Ezekutivu Fundasaun Hadomi Timor (FHT), Abrão Monteiro, husu Governu atu prepara rekursu umanu no konteúdu ba utilizasaun ba fibra ótika ne’ebé sei estabelese iha Timor-Leste.
“Ida kria lei sibernétika maibé ita mós tenke promove foinsa’e no indústria lokál sira tenke kria konteúdu barak. Se konteúdu laiha, ita-nia investimentu fibra ótika saugate de’it no atu utiliza de’it ba Facebook no Tik Tok ne’e la importante. Tenke servisu instituisaun Estadu sira dijitaliza ona atu iha efisiénsia serbisu ne’e. Dijilitalizasaun ne’e atu fasilita servisu públiku sira,” Diretór ne’e hateten ba jornalista sira iha Vila Verde, bainhira halo diskusaun kona-ba reprezentante Organizasaun Sosiedade Sivil no Governu ho tema “Importánsia lei krime sibernétika, Protesaun dadus, privasidade no Komérsiu online”, segunda ne’e.
Tuir nia, aleinde Governu esforsu kria ezbosu lei kona-ba sibernétika atu prevene no kriminaliza ameasa ba iha krime sibernétika ne’e rasik, tenke apresia mós rekursu sira hanesan preparasaun konteúdu sira hanesan kria plataforma barak ba iha servisu online.
“Presiza iha fonte ida oinsá atu bele fó retornu ida ka reseita ba iha Estadu,” nia hateten.
Governu tenke jere didi’ak fibra ótika, tanba ida-ne’e sai rekursu alternativa ba iha Estadu hodi prodús ka hatama reseita ba Estadu, aleinde rekursu mina-rai.
Tan ne’e, atu jere fobra ótika ne’e rasik presiza iha mós rekursu umanu kualifikadu “Ita prepara ekipamentu tekonolojia didi’ak no avansadu, maibé kapasidade utilizasaun ladi’ak ne’e ladun efetivu.
“Iha kapasidade maibé konteúdu lokál ne’e, hanesan de’it. Tenke kria konteúdu barak husi Governu no empreza lokál sira atu hakonu fibra ótika. Saida mak ita presiza ba iha rede, konteúdu, plataforma ba servisu Governu nian,” nia dehan.
Nia hateten, Timor-Leste sei utiliza fibra ótika iha Timor-Leste ho velosidade ka kuantidade 27 terabyte.
Jornalista : Jesuína Xavier
Editór : Cancio Ximenes
