DILI, 02 dezembru 2024 (TATOLI)—Vise Ministru ba asuntu Parlamentár, Adérito Hugo da Costa, informa daudaun ne’e Governu prepara hela ezbosu dekretu-lei ba ezekusaun Orsamentu Jerál Estadu (OJE) 2025 ho montante bilaun $2,6.
Notísia Relevante: PR Horta promulga ona Proposta Lei OJE 2025 biliaun $2,6
Governu hato’o nia apresiasaun aas tebes tanba Prezidente Repúblika (PR), José Ramos Horta ne’ebé akompaña dezde elaborasaun orsamentu husi nível komite revizaun orsamentu, aprovasaun iha Konsellu Ministru no períodu diskusaun audiénsia públika iha Parlamentu Nasionál (PN) to’o aprovasaun finál globál.
PR akompaña ho di’ak tebes tanba ne’e depois redasaun finál Prezidente Parlamentu Nasionál, Maria Fernanda Lay, envia dekretu PN kona-ba proposta-lei OJE 2025 ba PR no imediatamente PR halo promulgasaun, no hanesan iha lei ne’e hateten iha promulgasaun ne’e katak nia entrada vigór imediatamente iha 01 janeiru 2025.
“Hanesan públiku hotu akompaña iha debate orsamentu iha PN, faze ezekusaun OJE 2025 tenke entrada imediata tuir paréser komisaun C (trata asuntu Finansa Públika iha PN) katak, labele demora iha ezekusaun iha trismestre dahuluk. Tanba, kada tinan orsamentu ne’e iha trimestre dahuluk sempre iha períodu preparativu tékniku no dokumentu nian, nune’e ezekusaun bele tama fali iha trismestre daruak. Tan ne’e, rekomendasaun klaru husi PN no Governu konsidera ida-ne’e no Ministériu Finansa oras ne’e prepara hela ezbosu dekretu-lei ba ezekusaun orsamentu 2025,” Vise Ministru asuntu Parlamentár, Adérito Hugo da Costa, hateten ba jornalista sira iha resintu PN, segunda ne’e.
Nune’e, nia hateten, Governu konsidera opiniaun no rekomendasaun sira mai husi debate PN nian katak Governu tenke prepara antes ona dekretu ezekusaun.
Tan ne’e, Ministériu Prezidénsia Konsellu Ministru kaer ba ida-ne’e koordena ho Ministra Finansa sira agora prepara hela ezbosu ne’e.
“Ha’u espera iha tempu badak, kuarta (04 dezembru), ministériu bele aprezenta ona proposta dekretu-lei ezekusaun orsamentu nian iha Konsellu Ministru (KM), tanba iha dezembru ne’e tenke prepara hotu ona, rekezitu ida importante mak dekretu ezekusaun,” nia hateten.
Nune’e, iha reuniaun KM tempu badak, antes tama ba natál bele halo ona apresiasaun no aprovasaun ba dekretu ezekusaun nune’e iha janeiru 2025 imeadatamente halo ona distribuisaun ba ezekusaun kada liña ministeriál.
Jornalista : Nelson de Sousa
Editór : Cancio Ximenes
