COVALIMA ,02 Dezembru 2024 (TATOLI) – Ministra Solidariedade Sosiál no Inkluzasaun (MSSI), Verónica das Dores, halo vizita domisiliária bá ema ho defisiénsia iha postu administrativu Suai no Maucatar, munisípiu Covalima.
“Ami halo vizita domisiliária ba ema ho defisiénsia, tanba ita haree kondisaun sira-nia ne’e merese atu hetan vizita no ita presiza duni atu apoia sira”, ministra dehan iha suku Matai, ohin.
Hafoin vizita, governante ne’e adianta katak no sei foti solusaun atu lori ema ho defisiénsia bá iha sentru reabilitasaun hodi tuir terapia, ne’ebé sei akompaña husi família.
Aleinde ne’e, sei konstrui dapur no dada bee no sosa sasán balun ba ema ho defisiénsia ida ne’ebé hela mesak iha aldeia Sanfuk, suku Camnasa, postu Suai.
Prosesu atu apoia materiál ne’e sei koordena ho Diretór-Jerál MSSI, Lourenço Dias Gonzaga, nune’e bele transporta sasán bá Covalima tanba tuir prosesu Estadu ne’e kle’ur, maibé ministra sei uza osan privada hodi sosa nune’e lalais.
Elisabet Luruk Nahak, família husi defisiénsia fízika Inocêncio Amaral (13) ne’ebé hela iha suku Suai Loro, dehan Inocêncio moris mai ho kondisaun defisiénsia no nia mak kuidadu to’o ohin loron.
“Ha’u-nia bei-oan moris mai ho prematura, ne’ebé nia kondisaun defisiénsia no halo ona tratamentu iha nasionál, maibé ami laiha família no laiha mudansa, entaun lori fila mai Suai. Ami lori nia bá konsulta iha Indonezia durante tinan ida, maibé la di’ak”, nia relata.
Notísia relevante: Família vulneravel no EhD 219 iha Maucatar simu nesesidade bázika
Jornalista: Celestina Teles
Editora: Maria Auxiliadora
