OÉ-CUSSE, 02 Dezembru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, hamutuk ho membru autoridade sira halo diálogu komunitáriu no komemora Loron Proklamasaun Independénsia da-49 ho populasaun Pássabe.
“Ohin, ha’u mai ho ha’u-nia sekretáriu rejionál sira atu ko’alia kona-ba imi-nia dalan ba bee-moos, tanba Pássabe izoladu no dook husi kapitál Oé-Cusse, Objetivu husi vizita ne’e mós atu selebra Loron Proklamasaun Independénsia 28 Novembru”, Rogério Lobato dehan iha ámbitu diskusaun ne’e.
Tema ba komemorasaun Loron Proklamasaun ne’e mak “Orgullu ba ita-nia identidade no kultura, ita harii futuru lideransa ba ita-nia Povu”.
Prezidente ne’e mós salienta katak selebrasaun loron nasionál foin lalais iha Pante Makasar ne’e balun la konsege partisipa, tanba distánsia dook, tanba ne’e nia hamutuk ho komunidade hodi halo reflesaun no diálogu.
Jestór sub-rejiaun Pássabe, Paulino Marques, dehan prezidente autoridade halo ona vizita dala rua bá komunidade Pássabe hafoin asume kargu hodi lidera RAEOA.
“Benvindu prezidente autoridade ho ekipa tomak, ne’ebé ho laran-luak mai vizita komunidade iha postu administrativu Pássabe maske atravesa kondisaun dalan aat, espera katak ho prezensa ne’e bele enkoraja komunidade, liuliu foinsa’e sira atu partisipa ativa ho kriatividade hodi dudu dezenvolvimentu iha aspetu hotu”, nia dehan.U
Notísia relevante: Paulino Marques husu Autoridade RAEOA prioriza estrada iha Pássabe
Iha sorin seluk, xefe suku Abani, Carlos Elo, espera katak ho prezensa autoridade RAEOA iha sub-rejiaun Pássabe bele rona preokupasaun populasaun nian hodi tau iha planu atu iha futuru bele rezolve.
“Ami espera rona ami-nia problema sira hanesan estrada, bee-moos no seluk-taan, nune’e bele tulun ami iha postu Pássabe. Ami hakarak vizita beibeik ami iha baze atu hatene povu nia susar hodi tau planu atu rezolve, tanba ita hatene Pássabe kuandu udan ita-labele asesu bá Pante Makasar tanba dalan aat”, nia hateten.
Tuir dadus sensu 2022, sub-rejiaun Pássabe iha totál populasaun 7.373, ne’ebé mai husi suku Abani iha 1.583 no Malelat 1000-resin.
Jornalista: Abílio Elo Nini
Editora: Maria Auxiliadora
