OÉ-CUSSE, 03 Dezembru 2024 (TATOLI) – Autoridade lokál sira husi suku Abani no Malelat, iha sub-rejiaun Pássabe, husu ba Ministériu Interiór atu aumenta postu Unidade Patrullamentu Fronteira (UPF) iha Pássabe, tanba fatin ne’e nia área luan no difikulta membru UPF sira halo kontrolu ho másimu.
“Iha Pássabe, postu UFP rua no iha suku Abani de’it, ida iha Haumeni-Ana no ida iha Krús. Suku Malelat nian ha’u sente laiha tanba ida fali iha Noa-Ana, suku Lela-Ufe, sub-rejiaun Nítibe nian. Ne’ebé distánsia entre postu UPF sira dook no susar tebes atu ita-nia seguransa sira halo kontrolu másimu”, xefe suku Abani, Carlos Elo, dehan iha ámbitu diálogu ho Prezidente Autoridade RAEOA, Rogério Lobato, iha Pássabe.
Autoridade ne’e realsa katak iha postu UPF Haumeni-Ana atu halo patrullamentu ne’e tenke bá to’o postu Krús no ida ne’e dook, kuaze loron tomak mak bele kobre to’o ne’ebá.
“Ida-ne’e mak haree nia espasu sira hanesan ne’e, di’ak liu konstrui tan postu ida iha klaran, liuliu iha suku Malelat. Depois, postu UPF dook tiha ona no postu ida iha membru na’in-haat ka lima de’it. Ida-ne’e labele halo kontrolu másimu ba ita-nia fronteira sira, ita espera Ministériu Interiór haree problema ne’e, ita labele fó sala fali ba ita-nia UPF sira, maibé haree mós postu no membru la sufisiente”, nia dehan.
Iha fatin hanesan, Xefe suku Malelat, José Marques, dehan durante ne’e komunidade iha sub-rejiaun Pássabe moris ho hakmatek, tanba prezensa UPF sira iha fronteira, maibé nia haree katak postu Krús atu bá to’o Malelat ho distánsia dook, tanba ne’e nia husu ba Prezidente Autoridade RAEOA atu hato’o problema ne’e ba Governu Sentrál atu tau-matan.
“Ha’u-nia suku Malelat prepara ona fatin ida atu oferese ba Governu. Fatin ne’e ami la husu indemnizasaun, ami husu de’it konstrui postu UPF ida atu tau-matan ba ami-nia fronteira. Tinan hirak liubá Governu mai identifika, maibé to’o agora ami hein nafatin, tanba fatin ami prepara ona no bainhira mak harii postu iha Malelat?”, nia husu.
Notísia relevante: Autoridade Nitibe husu Guvernu konstrui postu UPF iha Fatusobe
Hatán ba rekomendasaun sira ne’e, Prezidente Autoridade RAEOA, Rogério Tiago Lobato, sei hato’o ba Governu sentrál, tanba ne’e kompeténsia nasionál, liuliu Ministériu Interiór.
“Nu’udar autoridade, ita-nia responsabilidade mak tenke hadi’a estrada sira atu asesu to’o ne’ebá. Ba asuntu fronteira la’ós ita la haree, maibé ita-nia forsa seguransa tutela direta ba nasionál ne’ebé buat sira-ne’e ha’u sei hato’o hotu, tanba RAEOA tutela direta iha primeiru-ministru nia okos”, dehan.
Nia lembra katak, iha tinan hirak liubá, bainhira asume kargu nu’udar Ministrú Interiór konsege hala’o vizita to’o sub-rejiaun Pássabe. “Iha 2003, ha’u mai ho maun boot Xanana hanesan Prezidente Repúblika. Ha’u observa estrada sira asesu bá postu sira di’ak, maibé agora komesa aat fali ona, ne’ebé iha osan uitoan ita-bele hadi’a, maibé atu harii postu ita entrega ba Governu sentrál”, nia salienta.
Notísia relevante: Rogério Lobato halo diálogu ho komunidade iha Pássabe
Jornalista: Abílio Elo Nini
Editora: Maria Auxiliadora
