BOBONARO, 03 dezembru 2024 (TATOLI) – Governu Sentrál hamutuk ho Autoridade Munisípiu Bobonaro, parseiru UNICEF no Asosiasaun Halibur Defisiénsia Rejiaun Oeste (AHDRO),tersa ne’e selebra Loron Mundiál Ema ho Defisiénsia ho atividade misa agradesimentu no marsa inkluziva hahú husi Kapela Ritabou ba to’o Jináziu Maliana ne’ebé akompaña ho animasaun Drum Bund husi estudante Eskola Koléjiu Infante de Sagres Maliana.
Iha oportunidade ne’e Sentru Solidariedade Sosiál no Inkluzaun mós apoia ai-han komplementár ba EhD na’in-60 ne’ebé hanesan prezente ba Natál no tinan foun 2025.
Ministra Solidariedade Sosiál no Inkluzaun, Verónica das Dores, ne’ebé le sai husi diretór CSSI Munisípiu Bobonaro, Acacio Gonçalves, kongratula EhD hotu iha munisípiu Bobonaro ne’ebé selebra loron mundiál defisiensia.
“Ohin loron selebrasaun iha munisípiu hotu-hotu hanesan pasu importante ida hodi promove, rekoñese no haforsa lideransa Ema ho defisiensia iha nível hotu-hotu liuliu feto ho defisiénsia hodi bele envolve no partisipa ativamente iha atividade komunidade nia, eskola Igreja no seluk tan,” nia hateten iha Jináziu Maliana.
Nia hatutan, durante ne’e MSSI mós halo ona programa pagamentu pensaun sosiál ba EhD, bolsa da mãe kondisionál, atensaun espesiál ba estudante ho difisiensia, asistente umanitária no apoia pontuál sira.
Alende liuhusi programa apoia instituisionál, MSSI mós apoia orsamentu ba organizasaun defisiénsia sira.
“Ha’u motiva ita hotu atu servisu hamutuk, apoia malu, aprende hamutuk tanba asuntu defisiénsia nu’udar asuntu transversál, signifika parte hotu-hotu iha responsabilidade implementa apoia ba programa no kna’ar ne’ebé MSSI halo hanesan programa inkluzasaun, defisiénsia laiha fatin atu halo kompetisaun, dezenvolvimentu inkluzivu ne’e knaar no responsablidade ita hotu nia,” nia hateten.
Sekretáriu Autoridade Munisípiu Bobonaro ba Asuntu Sosiál, Júlio Carvalho Caero, hateten iha ámbitu selebrasaun loron mundiál defisiénsia ne’e buat ida ho nia sente emosionál no fó apresiasaun boot tanba foin primeira-vez hare Ema ho Defisiensia le leitura iha selebrasaun misa agrdesimentu ba loron mundiál defisiénsia ne’ebé realiza iha Kapela Ritabou.
“Nia lee leitura mós la sala, rona ba liafuan ne’e kapás loos, ida-ne’e hatudu katak ita nia maluk defisiénsia sira mós bele hanesan ho ita ne’ebé ho kondisaun normál,” nia akresenta.
Nia dehan, ho eventu hanesan ne’e Autoridade Munisípiu Bobonaro bele koñese no senti saida mak Ema ho Defisiénsia sira senti durante ne’e.
Diretór Ezekutivu AHDRO, Sebastião de Fátima, sente orgulu no agradese ba governu no parseiru sira tanba tinan ne’e bele selebra loron mundiál defisiénsia iha nível munisípiu.
“Sira iha komitmentu boot loos hodi selebra loron importante ida+ne’e, ami AHDRO nia haree tinan ne’e ita bele marka tan istória foun ida katak Governu Timor-Leste konsidera no hanoin ona ba oin ne’e Ema ho Defisiensia hakarak selebra loron importante ne’e iha munisípiu,” nia hateten.
Sentimentu hanesan mai mós husi membru AHADRO, Maria Fátima Gouveia, tanba tinan ne’e bele selebra loron mundiál defisiensia ho atividade oinoin.
“Ida ne’e di’ak tebes mai ami atu nune’e ema labele hamosu diskriminasaun mai ami, ha’u sente ita-nia governu valoriza ona ami no la husik ami iha kotuk” nia dehan.
Notísia relevante: AHDRO husu sidadaun hotu iha Bobonaro respeita Ema ho Defisiénsia
Jornalista: Sérgio da Cruz
Editór: Evaristo Soares Martins
