DILI,03 dezembru 2024 (TATOLI) — Vise Ministru Fortalesimentu Instituisionál Saúde, José Magno, husu ba komunidade sira atu kontrola liuhusi limpeza iha tempu udan ho objetivu prevene moras dengue.
“Agora daudaun udan monu rai, ita tama ba moras dengue nian, karik Ministériu Saúde nian ba halo prevensaun moras dengue mak ita-nia ambiente ne’e, ita tenke kontrola ba bee sira iha tanke, tenke hamos bebeik, nune’e labele hamosu moras dengue”, Jose Magno dehan ba jornalista sira iha Palásiu Prezidensiál Aitarak Laran, ohin.
Nia dehan, bainhira udan monu rai, ita boot sira haree valeta sira ne’e foer nakonu, entaun idaºne’e mak atu kria susuk moris ba hodi fó moras ba ema.
“Ita boot sira haree, ita-nia valeta ne’e, Governu halo esforsu makas los, liuhusi obras públika halo servisu makas los atu loke luan tan valeta sira ne’e, maibé bainhira udan uitoan de’it ita lao ba haree, lata mamuk, aqua mamuk sira ne’e mai nakonu los iha valeta sira, entaun ida-ne’e halo ambiente foer hodi susuk atu moris ba”, nia afirma.
Iha sorin seluk, Diretór Servisu Saúde Munisípiu Dili, Mateus Pinto, dehan moras dengue hanesan moras infeksaun ne’ebé mosu, tanba virus dengue, ne’ebé mosu tanba kauza husi susuk tata.
“Ita iha dadus ne’ebé mak tama iha SSMD hahu husi fulan-Janeiru to’o Outubru tinan 2024 konsege rejistu pasiente ho idade tinan 6 ida mate tanba moras dengue”, Mateus Pinto informa.
Nia esplika, Virus dengue transmite husi Aedes aygipty no susuk Aedes albopictus hanesan trasmitidór moras dengue nian moris iha komunidade sira nia leet. Tanba ne’e normalmente hatudu sintomas depois tata kuaze loron 3 to’o loron 14. No sintoma husi moras dengue ne’e mak bedoko hakaas, ulun moras ruin-sin.
Mora dengue ne’e normalmente akontese iha tempu udan, ne’ebé kada tinan Munisípiu Dili mak sempre sai primeiru lugar ba moras dengue, tanba kada fulan, sentru saúde lima iha Dili laran sempre rejistu pasiente moras kuaze atus resin.
Pasiente ho idade tinan neen ne’ebé mak lakonsege salva ne’e hamutuk 714 iha Sentru Saúde lima iha Dili, hanesan Sentru Saúde Comoro, Sentru Saúde Formosa, Sentru Saúde Vera Kruz, Sentru Saúde Becora no Sentru Saúde Hera.
“Ha’u hanoin, ita hotu hatene katak moras dengue, moras ida ne’ebé mosu kada tinan sempre iha udan monu rai, entaun iha tinan ida-ne’e, dezde janeiru 2024, ita hetan moras dengue ne’ebé mak rejistradu hamutuk 714 no mate na’in ida”, nia subliña,
Jornalista : Felicidade Ximenes
Editór : Zezito Silva
