COVALIMA ,03 Dezembru 2024 (TATOLI) – Ministériu Solidariedade Sosiál no Inkluzaun (MSSI) presiza hadi’a sistema atendimentu ba família idozu ne’ebé mate atu hetan direitu ba pensaun, tanba nia prosesu ne’e demora liu.
Xefe suku Matai, postu administrativu Maucatar, Nuno José Pereira, hato’o preokupasaun ne’e ba Ministra Solidariedade Sosiál no Inkluzaun, Verónica das Dores, iha Covalima, ohin.
“Durante ne’e prosesu atendimentu ba idozu ne’ebé mate atu simu nia direitu pensaun kle’ur, tanba ne’e presiza hadi’a sistema hodi fasilita ita-nia inan-aman sira. Idozu ne’ebé mate dala ruma [família] sira atu foti nia direitu ba pensaun ho prosesu naruk. Presiza fo atendimentu ho lais liu, di’ak ba komunidade vulneravel sira”, Nuno Perreira sujere.
Abitante Angelina Amaral esplika katak bainhira atu simu direitu pensaun ba idozu ruma ne’ebé mate presiza dokumentu sir hanesan deklarasaun husi xefe suku, sertidaun óbitu husi notariadu, fotokópia kartaun eleitorál matebian nian no nia família, nomós karta husi Ministériu Solidariedade Sosial no Inkluzaun (MSSI).
“Presiza duni hadi’a duni sistema atendimentu ba idozu ne’ebé mate atu hetan fali nia direitu ba pensaun, tanba família trata dokumentu ne’e presiza tempu”, nia reforsa.
Ministra Solidariedade Sosial no Inkluzaun, Verónica das Dores, konsidera preokupasaun ne’ebé hato’o husi xefe suku no abitante sira.
“Ita-nia idozu ne’ebé hakotu ona iis atu hetan sira-nia direitu ba pensaun ho prosesu, tanba la’ós ministériu mak kria maibé regra husi Banku Nasionál Komésiu Timor-Leste”, nia klarifika.
Governante ne’e esplika razaun tanba ida-ne’e relasiona ho osan, nune’e povu nia osan presiza jere ho di’ak no bainhira jere osan la tuir regra Tribunál konsidera ministériu mak falsifika dokumentu.
Nia hatutan, bazeia ba esperiénsia, idozu balun mate ona maibé ema balun falsifika dokumentu, tanba ne’e regra banku nian rigór tebes, nune’e atu simu osan presiza dokumentu sira.
Tuir dadus, idozu no invalidez iha munisípiu Covalima hamutuk 6.500, husi númeru ne’e postu administrativu Zumalai 1.665, Suai 1.840, Fatululik 233, Maucatar 990, Fatumea 485 no Tilomar 747.
Notísia relevante: Benefisiáriu 331 iha Lour simu ona subsídiu idozu no invalidez
Jornalista: Celestina Teles
Editora: Maria Auxiliadora
