COVALIMA, 18 marsu 2024 (TATOLI) – Institutu Nasionál Seguransa Sosiál (INSS), liuhusi Banku Nasionál Komérsiu Timor-Leste (BNCTL) halo ona pagamentu, faze dahuluk, ba idozu no invalidez hamutuk 331 iha suku Lour, postu Zumalai, munisípiu Covalima.
Xefe suku Lour, Marinho Júlio Barreto, hatete pagamentu ba idozu no invalidez ba faze dahuluk ne’ebé hala’o iha sede aldeia Ritiluli ne’e benefisiáriu balun seidauk marka prezensa tanba kondisaun saúde la permite.
“Iha balun la mai tanba moras. Tuir informasaun ne’ebé ha’u simu husi banku, sira presiza halo deklarasaun iha INSS hafoin bele foti osan iha BNCTL sentrál”, autoridade lokál ne’e informa.
Iha sorin seluk, benefisiáriu Mateus Perreira agradese tanba Governu hahú ona halo pagamentu ba idozu no invalidez, nune’e sira uza osan refere ba nesesidade uma-laran nian.
“Ami katuas ona no atu halo toos mós ami-nian forsa lahanesan uluk, entaun ho politíka Governu halo pagamentu, ami bele uza osan refere”, Mateus dehan iha suku Lour, ohin.
Tuir dadus, benefisiáriu husi postu administrativu hitu iha Covalima hamutuk 6.500. Oráriu pagamentu husi BNCTL hahú iha loron 18 marsu iha postu administrativu Zumalai ho nia benefisiáriu hamutuk 1.665. Iha loron 19, iha postu Suai ho nia benefisiáriu hamutuk 1.840, iha data tuirmai halo pagamentu iha postu Fatululik ho benefisiáriu 233 no Maucatar 990. Iha 21 marsu, iha Fatumea ho benefisiariu hamutuk 485 no, iha loron 22, iha Tilomar ho nia benefisiáriu 747.
Rekorde katak Konsellu Ministru aprova ona alterasaun dahuluk Dekretu-lei númeru 53/2022 , 20 jullu ne’ebé aprova rejime jurídiku pensaun sosiál invalidez iha ámbitu rejime naun kontributivu seguransa sosiál mensiona mós katak subsídiu fahe kategoria ho idade ne’ebé kategoria dahuluk husi 60-69 sei hetan $60, kategoria daruak ho idade 70-80 hetan $80 no kategoria datoluk, ho idade 80 ba leten sei simu $100.
Bazeia ba dadus INSS, idozu ne’ebé sei simu pagamentu iha tinan ne’e tuir idade husi 60-69 hamutuk 42.177, tinan 70-79 hamutuk 47.703 no 80 ba leten hamutuk 20.120. Ba pensaun sosiál invalidéz, bolu eskalaun únika ho idade 18-59 hamutuk rihun 10 ne’ebé kada fulan simu $60.
Dadus globál ba benefisiáriu idozu no invalidez iha tinan ne’e hamutuk rihun 120 ho nia orsamentu millaun $86.
Notísia relevante: Pagamentu subsídiu ba idozu-invalidéz 284 iha Suai Loro finaliza ona
Jornalista: Celestina Teles
Editora: Maria Auxiliadora