DILI, 03 dezembru 2024 (TATOLI)—Prezidente Komisaun F trata asuntu Saúde, Igualidade Jéneru no Inkluzaun Sosiál iha Parlamentu Nasionál (PN), Maria Gorumali Barreto, felisita Ema ho Defisíensia (EhD) sira hotu iha Timor-Leste (TL).
Notísia Relevante: Governu kontinua tau atensaun sériu ba Ema ho Defisiénsia sira
“Hakarak hato’o parabéns espesiál ba maluk Ema ho Defisíensia (EhD) sira-ne’ebé ohin (03 dezembru) komemora loron internasionál ba Ema ho Defisiénsia,” Prezidente Komisaun F ne’e hato’o iha intervensaun liuhusi reuniaun plenária PN, tersa ne’e.
Iha TL, nia dehan, Governu Konstitusionál da-sia (IX) iha tinan ne’e apoiu hodi fasilita komemorasaun loron espesiál ba EhD iha munisípiu hotu hahú kedas horisehik no iha loron ohin nian.
Nune’e, nia-parte partisipa mós semináriu iha munisípiu Ermera no iha ne’eba maluk EhD hato’o lamentasaun barak ne’ebé durante ne’e kontinua hasoru iha sira-nia moris hanesan estigma no diskrimasaun iha família no sosiedade, liuliu kontinua bolu sira ho linguajen ne’ebé la dignu.
Tanba ne’e, nia husu oinsá konsidera respeita sira no ema lahó defisíensia sira atu kontinua hatoman aan oinsá atu uza linguajen dignu hanesan ema ho defisíensia matan, ema ho defisiénsia tilun, ema ho defisiénsia fíziku no ema ho defisiénsia komunikasaun.
“Ida ne’e mak sira-nia lamentasaun hato’o iha horise’ik,” nia dehan.
EhD sira mós husu komisaun G trata asuntu Edukasaun iha PN atu fó hanoin ba iha Ministériu Edukasaun no Ministériu Ensinu Superiór Siénsia no Kultura (MESSK) atu kontinua tau atensaun ba sira liuliu ba iha proporsiona asesibilidade iha ensinu ba aprendizajen, espesialmente linguajen jestuál atu nune’e bele fasilita sira bainhira asesu ba setór edukasaun.
Jornalista : Nelson de Sousa
Editór : Cancio Ximenes
