DILI, 02 dezembru 2024 (TATOLI)—Vise Ministru ba asuntu Parlamentár, Adérito Hugo da Costa, felisita Ema ho Defisíensia (EhD) sira iha Timor-Leste (TL) iha ámbitu komemorasaun loron internasionál ba Ema ho Defisiénsia (EhD) ne’ebé kada tinan mundu selebra iha 03 Dezembru.
Notísia Relevante: GMPTL rekomenda Governu implementa planu asaun nasionál ba EhD
“Governu no Estadu Timor-Leste tomak, dezde inísiu transforma atensaun sériu Estadu nian ba ema ho defisíensia iha polítika orsamentu nian kada tinan iha ita-nia ajenda nasionál sira. Ba ema ho defisíensia sira mós tau konsiderasaun aas,” Vise Ministru ba asuntu Parlamentár, Adérito Hugo da Costa, hateten hodi responde Agência TATOLI iha ámbitu komemorasaun loron internasionál ba EhD, iha resintu Parlamentu Nasionál (PN), segunda ne’e.
Tanba ne’e, nia hateten, ho momentu selebrasaun hanesan ne’e relembra nafatin ba entidade hotu-hotu, liuliu Governu no Estadu hodi kaer nafatin prinsípiu universal ne’e, nune’e polítika Governu nian iha setór sosiál ne’e hateten inkluzaun sosiál hola parte iha polítika Governu no Estadu nian.
Movimentu rejionál no globál ba hotu-hotu tau atensaun ba ida-ne’e, no TL mezmu nasaun ida foin restaura nia indepedénsia ba da-22 maibé prinsípiu sira-ne’e komunga prátika di’ak iha mundu internasionál, oinsá tratamentu ida justu ba ema ho nasaun ida-idak nian no espesialmente iha TL.
Deputadu CNRT, Natalino dos Santos, felisita Ema ho Defsiénsia (EhD) hotu iha komemorasaun loron internasionál ne’e, nune’e enkoraja atu bele kontribui ba dezenvolvimentu no sira-nia direitu hanesan ho ema ne’ebé lahó defisíensia tanba ema hotu iha iha direitu no dever hanesan iha rai ida-ne’e.
“Aban (03 Dezembru),loron espesiál ba sira nu’udar umanu ita solidariedade ba sira-nia loron ida-ne’e. Ita festeza hamutuk ho sira no enkoraja sira, tanba sira mós importante iha Estadu ida ne’e nu’udar sidadaun Timor,” bia dehan.
Nia hatetetn, Governu liuhusi Ministériu Solidariedade Sosiál no Inkluzaun (MSSI) ne’ebé ninia serbisu tomak atu apoiu no haree no fasilita hodi rona ema ho defisiénsia (EhD) nian lian, nune’e mós iha Prezidensia Repúblika nia portavós atu aspira sira ninia hanoin no hakarak ba Estadu.
Hanesan mós, nia hateten, Deputadu sira reprezenta sira entaun sempre ko’alia sira-nia direitu ne’ebé hanesan ho timoroan sira seluk no direitu hanesan.
Notísia Relevante: Orsamentu MSSI aprovadu, PN husu tau atensaun ba sidadaun vulnerável
Jornalista : Nelson de Sousa
Editór : Cancio Ximenes
