DILI, 18 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 hamutuk $26,188,602 ba Ministériu Solidariedade no Inkluzasaun (MSSI) iha faze espesialidade ho votu 43 kontra 19 no abstensaun ida (1).
“Nune’e, orsamentu MSSI pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 faze espesialidade iha loron da-lima iha sala plenária PN, segunda ne’e.
Orsamentu $26,188,602 ne’e aloka ba saláriu vensimentu $3,982,088, bens no serbisu $10,744,951, transferénsia públika $9,501,672, kapitál menór rihun $500, kapitál dezenvolvimentu $1,459,891.
Orsamentu ne’e, atu finannsia programa funsionamentu no dezenvolvimentu institusionál ho sub-programa haat (4) no atividade 29.
Programa inkluzaun sosiál ho sub-programa protesaun, solidariedade sosiál no inkluzaun ho atividade rua (2), sub-programa protesaun no promisaun direitu ema ho difisiénsia ho atividade lima (5), sub-programa reabilitasaun no reintegrasaun ba ema ho problema saúde mentál no defisiénsia ho atividade rua (2), sub-programa serbisu karru funeráriu no kaisaun ho atividade rua (2).
Sub-programa bolsa da mãe ho atividade tolu (3), sub-programa asisténsia sosiál umanitáriu ho atividade rua (2), sub-programa inkluzaun sosiál ho atividade tolu (3), sub-programa reintegrasaun komunitáriu ho atividade rua (2), sub-programa implementasaun NAP-rezolusaun 1325 ONU ho atividade haat (4), sub-programa implementasaun NAP-GBV ho atividade lima (5), sub-programa protesaun ba labarik iha risku no perígu ho atividade lima (5).
Tau atensaun ba sidadaun vulnerável
Reprezentante povu iha uma fukun PN liuhusi Deputadu FRETILIN, Antoninho Doutel Sarmento, liuhusi OJE ne’e hakarak husu tau atensaun ba másimu liután ba sidadaun no grupu vulnerável sira ba to’o iha área rurál iha territóriu.
Deputada FRETILIN, Lidia Soares, propoin alokasaun orsamentu iha Orsamentu Jerál Estadu (OJE) 2025 ne’e ba ema ho defisiénsia sira.
Deputadu KHUNTO, Luis Roberto, rekomenda atu mellora liután serbisu atendimentu sosiál ba povu hotu ne’ebé durante ne’e la’o ona no presiza atensaun ba ema ho mdefisiénsia mental sira-ne’ebé kontinua la’o iha fatin públiku presiza hetan protesaun.
Ministra Solidariedade no Inkluzasaun (MSSI), Veronica das Dores, hateten ministériu ninia orsamentu ne’e programa prioridade mak serbisu no atendimentu sosiál.
Programa serbisu no atendimentu sosiál ida-ne’e importante tebes ne’ebé durante ne’e la’o hela no tinan oin kontinua nafatin ho programa ne’e iha MSSI, esensiál liu mak haree liu ba família vulnerável sira hanesan idózu, inan sira-ne’ebé afeta problema entermu familiár no violénsia bazeia ba jéneru no tau atensaun ba violénsia hasoru menoridade sira, no apoiu uma mahon sira tanba sira mak Governu nia liman no ain ne’ebé tau matan hela ba família vulnerável sira.
Jornalista : Nelson de Sousa
Editór : Cancio Ximenes
