OÉ-CUSSE, 04 Dezembru 2024 (TATOLI) – Empreza Haumeni-Aisaf entrega mobiliáriu eskolár 2.680 ba Sekretaria Rejionál Edukasaun no Asuntu Sosiál Oé-Cusse hodi disponibiliza ba eskola sira atu utiliza ba prosesu ensinu aprendizajen iha anu letivu 2025.
Mobiliáriu sira ne’e kompostu husi meza no kadeira ba estudante sira hamutuk 2.500, meza no kadeira ba profesór 129 no kuadru hakerek 51.
Sekretária Rejionál Edukasaun no Asuntu Sosiál, Inácia Tamele, dehan tuir kontratu, empreza fornesedora tenke entrega ekipamentu sira ne’e iha Fevereiru 2025, maibé sira esforsu no entrega kedas iha Dezembru, nune’e iha inísiu tinan oin bele distribui ona ba eskola sira.
“Tanba maioria eskola sira iha Oé-Cusse husi ensinu pré-eskolár to’o sekundáriu sei falta mobiliáriu. Maske ohin kompañia entrega tan, maibé seidauk responde ba [nesesidade] eskola sira-nia”, Inácia Tamele dehan iha Oé-Cusse, ohin.
Notísia relevante: Inácia Tamele prioriza programa haat hodi hadi’a kualidade edukasaun Oé-Cusse
Atu distribui mobiliáriu hirak-ne’e, Sekretária Edukasaun no Asuntu Sosiál sei koordena ho tékniku sira atu identifika eskola sira ne’ebé presiza liu, inklui eskola foun sira.
“Ami diskute hela ho tékniku sira atu fó prioridade ba eskola ne’ebé falta mobiliáriu no prioridade ba eskola foun sira-ne’ebé foin entrega”, nia reitera.
Iha fatin hanesan, Vitorino Poto, reprezenta empreza fornesedora informa iha kontratu ne’e Governu husu tenke fornese item tolu mak hanesan kadeira no meza ba estudante no manorin sira no kuadru hakerek.
“Ohin, ami entrega ona ba autoridade RAEOA liuhusi Sekretaria Edukasaun. Tuir loloos nia kontratu to’o Fevereiru 2025, maibé tanba iha inisíu 2025 eskola sira atu uza ona, tanba ne’e ami tenke entrega iha Dezembru, nune’e bele trasa planu ba distribuisaun ba eskola sira”, nia salienta.
Notísia relevante: Edukasaun sei distribui mobiliáriu ba eskola sira iha territóriu Oé-Cusse
Totál despeza ne’ebé prevista iha dokumentu kontratu ba fornesimentu mobiliáriu hamutuk $293.720, kontratu hahú iha fulan-Agostu 2024 to’o Fevereiru 2025.
Jornalista: Abílio Elo Nini
Editora: Maria Auxiliadora
