COVALIMA, 04 Dezembru 2024 (TATOLI) – Ministériu Agrikultura, Pekuária, Peska no Floresta (MAPPF) divulga informasaun kona-ba regulamentu esportasaun no importasaun ba produtu agríkola ba emprezáriu no komunidade sira iha Tilomar, munisípiu Covalima.
Diretór Unidade Kuarentena no Biosseguransa, Manuel da Costa, informa katak presiza partilla informasaun, tanba komunidade seidauk iha koñesimentu kona-ba prosesu importa no esporta produtu agríkola liuhusi fronteira Mota-Masin.
“Ami husi Unidade Kuarentena no Biosseguransa sensibiliza informasaun kona-ba serbisu Kuarentena kona-ba regulamentu ba esportasaun no importasaun protudu agríkultura, ne’ebé durante ne’e empreza sira esporta no importa liuhusi fronteira Mota-Masin”, Manuel da Costa dehan iha salaun postu administrativu Tilomar, ohin.
Tuir dekretu-lei númeru 41/2023 kona-ba Saúde Animál no Kuarantena no dekretu-lei númeru 36/2023 kona-ba Fitosanidade no Kuarantena bainhira atu importa animál presiza liuhusi Kuarantena no importa balada ne’ebé livre husi moras, nune’e labele lori risku ba nasaun no seguru ba ema nia saúde.
Manuel da Costa dehan produtu agríkola ne’ebé importa liuhusi prosesu Kuarentena iha fronteira Mota-Masin mak hanesan ai-fuan, na’an-manu, ikan, boek, ai-funan no seluk tan. Aleinde ne’e, empreza timoroan esporta produtu sira mak hanesan kamii, kafé, maek, nuu maran no seluk tan.
Diretora empreza Madarlin, Maria Borges, dehan sensibilizasaun ba informasaun bele hasa’e koñesimentu sobre regulamentu ba prosesu importasaun no esportasaun produtu agríkola liuhusi fronteira.
Nia husu mós ba komunidade labele fa’an kamii liuhusi dalan ilegál ba empreza Madarlin, nune’e bele kontribui reseita ba kofre Estadu.
Empreza lokál ne’e esporta ona protudu sira hanesan kamii tonelada 400, kaju kilógrama 500, kopra kilógrama 400, maek tolelada ida no sukaer kilógrama 300.
Notísia relevante: MKI motiva emprezáriu Covalima halo esportasaun ba produtu lokál
Jornalista: Celestina Teles
Editora: Maria Auxiliadora
