DILI, 04 dezembru 2024 (TATOLI)—Komisaun D trata asuntu Ekonomia no Dezenvolvimentu iha Parlamentu Nasionál (PN), simu petisaun husi povu agrikultór husi Betano, munisípiu Manufahi kona-ba kompañia ne’ebé halo konstrusaun ba irrigasaun laiha kualidade, nune’e prezudika natar ektare 100 abandona no husu ezekutivu atu tau atensaun.
Notísia Relevante: Komisaun D kontinua husu MAPPF tau prioridade sosa tratór-hadi’a irrigasaun
“Ohin, komisaun aprova petisaun ne’e husi irrigasaun Betano, sira husu tanba durante ne’e kompañia rua halo konstrusaun ba irrigasaun ne’e lahó kualidade,” Deputadu komisaun D, Manuel Noronha, hateten ba jornalista sira hafoin ramata enkontru komisaun iha sala komisaun PN, kuarta ne’e.
Tanba ne’e, nia dehan, komunidade ka agrikultór sira iha Betano halo petisaun ne’e hodi kompañia bele haree fila-fali, maibé agora Governu mak foti kompeténsia atu halo reabilitasaun.
Nune’e mós, nia haktuir, iha sira-nia petisaun ne’e husu atu karik kompañia hahú halo konstrusaun irrigasaun ne’e atu koordena ho komunidade iha fatin ne’eba.
Ho aprovasaun petisaun ne’e, komisaun sei rekomenda ba ministériu kompentente atu bele responde preokupasaun povu agrikultór iha Betano hodi bele aumenta produsaun liuliu produsaun hare.
Entrrtantu, Deputadu husi bankada PD ne’e dehan, tuir planu Governu Konstitusionál da-sia (IX) nian, iha tinan oin sei halo konstrusaun ba irrigasaun lima ne’ebé presiza halo iha Maliana, Manufahi, Covalima no Lospalos.
Jornalista : Nelson de Sousa
Editór : Cancio Ximenes
