COVALIMA, 04 Dezembru 2024 (TATOLI) – Organizasaun nasionál ema ho defisiénsia iha Timor-Leste, Raes Hadomi Timor-oan (RHTO), enkoraja família atu apoia ema ho defisiénsia (EhD) sira asesu ba edukasaun, tanba ne’e mak xave ba dezenvolvimentu.
“Maluk defisiénsia labele lakon oportunidade, inan-aman presiza nafatin enkoraja ita-nia oan sira ne’ebé ho kodisaun defisiénsia no apoiu sira, nune’e bele asesu ba edukasaun”, pontu fokál RHTO Covalima, Rosito Amaral, dehan iha Suai Loro.
Nia salienta katak kondisaun EhD la’ós sai hanesan barreira atu asesu ba edukasaun, tanba ne’e MSSI presiza nafatin apoia sira asesu ba edukasaun, nomós kontinua disponibiliza nesesidade bázika ba sira.
Bazeia ba Konstituisaun RDTL, iha artigu 21, ko’alia kona-ba sidadaun ne’ebé iha defisiénsia fízika no mentál iha direitu, nomós obrigasaun hanesan sidadaun sira seluk, maibé sira sei la hala’o knaar hirak ne’ebé sira labele hala’o tanba de’it sira-nia defisiénsia no Estadu bainhira bele promove protesaun ba sidadaun sira-ne’ebé iha defisiénsia tuir lei haruka.
Palmira Amaral, nu’udar família defisiénsia dehan prontu lori nia oan ne’ebé ho defisiénsia bá eskola, maibé nia oan nia kondisaun liman mamar, nune’e labele kaer lapizeira ho di’ak.
“Ami prontu apoia ami-nia oan ne’ebé ho kondisaun defisiénsia atu asesu ba edukasaun, maibé depende ba situasaun balun bele bá eskola, maibé balun ita labele obriga”, nia realsa.
Ministra Solidariedade Sosiál no Inkluzaun (MSSI), Verónica das Dores, konsidera preokupasaun husi RHTO Covalima atu fó atensaun ba ema ho defisiénsia, maibé liuhusi prosesu.
“Ami tau konsiderasaun ba rekomendasaun sira, ami responde ho fazeadamente. Ohin ko’alia la’ós aban ita bele responde kedas, maibé liuhusi prosesu tanba ne’e presiza hein ho pasiénsia”, dehan.
Governante mós konta nia esperénsia serbisu iha sentru reabilitasaun katak ema ho defisiénsia lubuk ida mak konsege eskola ona iha nivel ensinu báziku to’o superiór.
Tanba ne’e, nia sei esforsu atu ema ho defisiénsia asesu ba edukasaun ne’ebé inkluziva no presiza serbisu hamutuk ho Ministériu Edukasaun (ME), Ministériu Ensinu Superiór, Siénsia no Kultura no ajénsia sira.
Tuir dadus Diresaun Nasionál Edukasaun no Asaun Eskolár, iha 2024 ne’e, rejista ema ho defisiénsia hamutuk 696 mak asesu ona ba edukasaun iha nivel ensinu báziku. Husi númeru ne’e Aileu na’in-117, Baucau 212, Rejiaun Administrativa Oe-Cusse Ambeno 47 no Viqueque 183.
Notísia relevante: MSSI promove lideransa ema ho defisiénsia iha nivel hotu
Jornalista: Celestina Teles
Editora: Maria Auxiliadora
