DILI, 04 dezembru 2024 (TATOLI)—Fundu Dezenvolvimentu Nasaun Unida ba Labarik (UNICEF) ho kooperasaun parseiru sira, sei reforsa formasaun kona-ba dadus ba jornalista sira.
“UNICEF sei serbisu hamutuk ho Konsellu Imprensa (KI) no Sekretaria Estadu Komunikasaun Sosiál (SEKOMS) ba futuru ne’e ita hametin liután formasaun kona-ba check ka verifikasaun faktu no dadus ba informasaun tuir ita-boot sira-nia rekomendasaun atu informasaun ne’ebé ita prodús tuir faktu estatístika no kredível,” Espesialista Advokasia no Komunikasaun iha UNICEF, Tapuwa Loreen Mutseyekwa, hato’o liuhusi nia diskursu iha ámbitu enserramentu formasaun kona-ba mudansa klimátika no étika reportajen ba labarik no feto, ba jornalista sira, iha salaun JL Vila, Fatuhada, kuarta ne’e.
Notísia relevante : UPJTL fasilita formasaun kona-ba papel mídia iha prosesu dezenvolvimentu ba jornalista
Nia konsidera, dadus importante ba produsaun notísia sira tuir situasaun no akontesimentu relevante sira ne’ebé ita hakarak hato’o públiku.
Nune’e, Tapuwa Loreen husu ba jornalista sira atu halo reportajen ba asuntu sosiál sira hanesan protesaun direitu labarik no feto nian iha sosiedade nia le’et.
Aleinde ne’e, asuntu kona-ba mudansa klimátika ne’ebé akontese globalmente inklui Timor-Leste, ne’ebé afeta ba moris labarik no feto.
Iha fatin hanesan, Diretór Jerál iha SEKOMS, Florindo da Costa, hateten, jornalista no mídia nia papel mídia liuhusi publikasaun notísia bele kontribui ba dezenvolvimentu nasionál.
“Jornalista sira iha papel importante, fatin sira ne’ebé kareta no motor la tama, sira la’o ain bele bá. Iha publikasaun sira ne’e bele loke ema-nia matan atubele ajuda ema sira ne’ebé presiza,” nia katak.
Biban ne’e, Diretór hato’o apresiasaun ba jornalista nia serbisu, ne’ebé bele sai parseiru di’ak ba Governu no ba ema hotu.
Nune’e mós, Diretor Nasionál KI, Altimoda Cruz Freitas, nota, apoiu kooperasaun Rádiu Komunidade no UNICEF di’ak tebes liuhusi programa Rádiu ba labarik.
“Ha’u apresia tebes programa koperasaun UNICEF ho Rádiu Komunidade tanba joven barak apreende no iha esperiénsia serbisu. Ema ida-idak kontribui liuhusi reportajen hanesan kona-ba eskola a’at ne’ebé bele hetan konstrusaun husi Governu no istória moris nian ne’ebé ema seluk bele fó apoiu,” nia tenik.
Jornalista : Jesuína Xavier
Editora : Julia Chatarina
