iklan

HEADLINE, KAPITÁL

UPJTL fasilita formasaun kona-ba papel mídia iha prosesu dezenvolvimentu ba jornalista

UPJTL fasilita formasaun kona-ba papel mídia iha prosesu dezenvolvimentu ba jornalista

Ambiente formasaun ne’ebé organiza husi UPJTL, iha salaun ETDA, Fatuhada, sábadu (23/11/2024). Imajen Tatoli/Osória Marques

DILI, 23 novembru 2024 (TATOLI)Uniaun Profisaun Jornalista Timor-Leste (UPJTL), sábadu ne’e, fasilita formasaun kona-ba papel mídia iha prosesu dezenvolvimentu no utiliza mídia ne’ebé ho responsabildade ba jornalista sira.

“UPJTL hetan apoiu husi Governu liuhusi Sekretaria Estadu Komunikasaun Sosiál (SEKOMS) hodi realiza workshop ne’ebé sei fasilita formasaun ba jornalista ho tema ‘papel mídia iha prosesu dezenvolvimentu no utilizasaun mídia ho responsabildade. Entaun objetivu hodi workshop ne’e atu oinsá fó formasaun ba membru sira hodi bele hola papel dezenvolvimentu ne’ebé mak loron-loron halo knaar hanesan rekolla informasaun, hakerek no prodús,” Prezidente UPJTL, Horácio Afonso Fátima Babo, hateten, iha fatin formasaun, salaun ETDA, Fatuhada.

Notísi relevante : Autoridade Bobonaro husu CI loke formasaun jornalizmu iha Balibo

Aleinde ne’e, sei ko’alia mós kona-ba utiliza rede sosiál ho di’ak, tanba dala barak uza la ho responsabildade, entaun liuhusi formasaun ne’e bele tulun membru sira hodi kapasita no eleva sira-nia koñesimentu.

“Ida-ne’e faze dahuluk formasaun ba membru sira no espera katak sei iha faze daruak nune’e bele tulun malu hodi hasa’e koñesimentu oinsá utiliza mídia ho responsabildade no balansu,” nia akresenta.

Iha biban hanesan, Sekretáriu Estadu Komunikasaun Sosiál, Expedito Dias Ximenes, apresia ho inisiativa husi uniaun ne’e tanba bele fasilita membru sira hasa’e koñesimentu.

“Agradese ba UPJTL tanba bele loke workshop hodi aumenta koñesimentu kona-ba papel jornalista no mídia iha prosesu konstrusaun Estadu. Ha’u sente ksolok tanba mezmu foun maibé konsege halibur jornalista 169-resin. Ida-ne’e hatudu katak UPJTL iha nia vizaun ne’ebé boot tebes hodi lori organizasaun UPJTL ne’e ba oin. Ha’u husu ba jornalista no mídia katak pilar demokrasia, pilar dezenvolvimentu unidade Nasionál, ita tenke halo balansu entre ba ita-nia responsabilidade. Tanba ne’e mak ho avansu teknolojia ita buka nafatin pilar importante ba dezenvolvimentu. Tanba ne’e formasaun ida hanesan importante ba ita-nia jornalista”, SEKOMS hatete.

Sekretáriu Estadu dehan, atu garante ezisténsia UPJTL ba oin, IX Governu Konstitusionál iha programa 18 no programa ida mak ko’alia kona-ba fortifika organizasaun jornalista sira. Tanba ne’e mak Governu fó osan ba organizasaun jornalista ida-idak hodi bele jere hodi formasaun ba jornalista sira.

“Ida-ne’e evidénsia katak UPJTL fó formasaun ba jornalista sira hanesan Timor-Leste Press Union (TLPU) no Asosiasaun Jornalista Timor-Leste (AJTL). Ha’u lori Governu nia naran kontente, ba oin ita sei serbisu hamutuk no sai parseiru estratéjiku,” nia katak.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!