COVALIMA, 05 Dezembru 2024 (TATOLI) – Xefe Suku Fohorem Júlio Ferreira Alves, lamenta tanba empreza Roman Junior abandona projetu dada bee-moos ba komunidade iha suku Fohorem, munisípiu Covalima.
“Ha’u dehan empreza abandona projetu dada bee-moos ba komunidade, tanba implementasaun projetu liu ona durasaun tempu, maibé to’o ohin loron seidauk finaliza. Nune’e, halo komunidade suku Fohorem kontinua halerik ba bee-moos”, Júlio Ferreira Alves hato’o preokupasaun, ohin.
Líder suku ne’e dehan, empreza hahú implementa projetu dada bee-moos iha 2021, maibé atu tama ona ba 2025 seidauk finaliza projetu ne’e.
Hanesan autoridade suku nia nafatin halo aprosimasaun ho administradór postu administrativu hodi submete karta atu bolu urjente empreza ne’e, maibé to’o agora empreza la hasoru autoridade postu nian.
“Empreza abandona projetu bee-moos durante tinan rua-resin, nune’e hamosu dúvida ba autoridade postu sira tanba empreza presiza responsabiliza projetu dada bee-moos iha Fohorem, nune’e bele finaliza”, nia salienta.
Koordenadór Bee Timor-Leste, Empreza Públika (BTL, E.P) Covalima, Castro Dody Ramos, rekoñese katak empreza Roman Junior seidauk finaliza projetu no sira halo ona koordenasaun ho BTL nasionál relasiona ho asuntu ne’e.
Empreza implementa projetu la tuir kontratu, maibé BTL fó nafatin oportunidade no bainhira iha Fevereiru 2025 la finaliza maka sei hasai notifikasaun atu hapara dada bee-moos ba populasaun Fohorem.
Nia esplika mós razaun empreza la finaliza projetu ne’e, tanba transporta fali materiál ne’ebé la tuir padraun no mudansa klímatika mós difikulta sira atu mobiliza ekipamentu dada bee-moos ba komunidade.
Orsamentu ba implementasaun projetu dada bee-moos ba komunidade suku Fohorem, postu administrativu Fohorem hamutuk rihun $400-resin.
Notísia relevante: BTL Covalima kontinua mellora sistema hodi distribui bee ba komunidade
Jornalista: Celestina Teles
Editora: Maria Auxiliadora
