DILI, 05 dezembru 2024 (TATOLI)—Eskola Ensinu Pre-Eskolár (EPE) Assisi Vila-Verde, kinta ne’e, realiza serimónia graduasaun ba estudante hamutuk 148 ne’ebé finaliza ona estudu iha nível Pre-eskolár.
“Totál estudante hamutuk 148, ne’ebé kompostu husi feto 59 no mane 98, ohin graduasaun ida-ne’e ba dala-sia no ida-ne’e ita fó importánsia ba kik-oan sira atu hakat ba nível Ensinu Báziku nia,” Diretora EPE Assisi Vila-Verde, Daniela Sinbolon, hato’o iha fatin serimónia graduasaun, salaun Katedral, Vila-Verde.
Tuir Diretora Eskola, estudante ne’ebé hahú husi Pre-eskolár ne’e bainhira hakat ba nível Ensinu Báziku iha mentalidade no koñesimentu ne’ebé di’ak tebes.
“Foufoun ne’e labarik sira mai ne’e la hatene buat ida, ita bele dehan sira ne’e hanesan papel mutin ida mamuk loos, depois de prosesu aprendizajen la’o, sira hahú koñese sasán komprende saida mak manorin sira ko’alia no sira mós hahú koñese letra ne’ebé iha, entaun husi ne’e sira hahú hakerek buat balun ne’ebé sira hatene iha sira-nia kakutak hodi komesa hakerek alfabetu, numerasia no bele hatene hakerek naran. Entaun ida-ne’e hanesan faze ida-ne’ebé ita prepara sira atu ba iha nível Ensinu Báziku,” nia akresenta.
Notísia relevante : ME akredita ona Edukasaun Pre-eskolár hamutuk 305
Iha sorin seluk, Reprezentante Servisu Edukasaun Munisípiu Dili, Joana Baptista, relata, tuir observasaun Ministériu Edukasaun, labarik sira ne’ebé hahú husi edukasaun pre-eskolár mak ba ensinu báziku ne’e diferente boot ho labarik sira ne’ebé la hahú estuda iha edukasaun pre-eskolár.
“Ne’e iha diferente boot tebes tanba labarik sira ne’ebé hahú husi edukasaun Pre-eskolár ne’e sira iha mentalidade di’ak no iha koñesimentu ba numerasia no literasia, maibé ba labarik sira ne’ebé mak la hahú husi edukasaun Pre-eskolár ne’e, tama foufoun ba lensinu báziku ne’e mentalidade fraku, laiha koñesimentu ba iha literasia no numerasia. Entaun Pre-eskolár ne’e hanesan fundamentu bázika para labarik sira bele apreende hodi hakat ba Ensinu Báziku,” nia tenik.
Reprezentante inan-aman, Maria Joselina, agradese ba profesór sira tanba ho pasiénsia bele eduka ona sira-nia oan hodi koñese literasia no numerasia.
“Agradese ba profesór sira tanba sira mesak ema ne’ebé pasiénsia hodi fera fatuk ne’ebé to’os la halimar ne’e ohin loron sai fatuk mamar ne’ebé hatene no kompreende saida mak literasia no numerasia,” nia katak.
Jornalista : Osória Marques
Editora : Julia Chatarina
