Hakerek letra múzika kona-ba Beleza Timor: Xanana perante artista timoroan sira
DILI, 05 dezembru 2024 (TATOLI) –Líder karismátiku, atuál Primeiru-Ministru, Kay Rala Xanana Gusmão, perante artista timoroan sira, husu atu lori Timor ba mundu liuhusi múzika iha lian tetun, portugés no inglés, la’ós de’it kona-ba domin maibé mós Beleza Timor-Leste nian, inklui pás iha mundu.
“Ida-ne’e la’ós de’it motivasaun ida ba ita hotu; ba ami nu’udar rona-na’in, ba imi nu’udar múziku-na’in. Maibé, motivasaun ida ba ita tomak liliu mós ba imi-nia alin sira, ba imi-nia oan sira,” Xanana Gusmão hateten, iha ámbitu primeira serimónia nasionál Timor-Leste music award 2024 ba artista timoroan sira ho kategória oioin, iha salaun Multiuzu GMN, Bebora, Dili, ohin kalan ne’e.
“Ne’e duni, husu ba imi (artista sira-red), semak iha talentu, halo nafatin letra, se mak hatene halo múzika, kompoen múzika i la’ós de’it I love you; I love you maibé buat selseluktan. Beleza ita-nia rain. Beleza ita-nia tasi. Beleza ita-nia ema,” líder ezekutivu ne’e husu.
“Buat oioin de’it, prosesu oioin de’it, hasoru violénsia. Husu ba mundu, konstrui pás iha mundu. Buat sira ne’e hotu. Loke! Loke imi-nia hanoin ba! Loke luan imi-nia hanoin! Ha’u fiar i povu tomak,” nia hatutan.
Xanana Gusmão haklaken, ho múzika, hein katak “Imi sei hatudu ba mundu dehan Timoroan mós iha vóz, iha talentu. No, ita bele kapta mundu, ita bele lori valór ne’ebé iha ita; ita-nia matenek lori ba kapta mundu hodi sira dehan Timor mós bele”.
“Ne’e duni, parabéns ba imi. Parabéns ba ita hotu. Husu tinan seluk sei di’ak liután. Husu ba imi hotu, esforsu aan nafatin hodi lori Timor ba mundu liuhusi múzika para ita sai tiha husi I love you; I love,” Xanana kongratula.
Notísia relevante:ALMAMOR prosede eventu Timor-Leste Music Awards 2024
Jornalista: Felicidade Ximenes
Editór: Rafael Ximenes de A. Belo
